Sápmelaš dáidda ja máilmmigovva bures oidnosis Londonis
Sápmelaš dáidda ja kultuvra besset oidnosii Londonis, go Through Our Eyes: Sámi Art and Culture (Min čalmmiiguin: Sápmelaš dáidda ja kultuvra) -čájáhus rahpasa árvvusatnon Somerset House -dáidda- ja kulturguovddážis. Sámedikki ságadoalli Pirita Näkkäläjärvi searvá doaluide, mat lágiduvvojit rahpandilálašvuođa oktavuođas Londonis.
Govvateaksta: Sámedikki ságadoalli Pirita Näkkäläjärvi Through Our Eyes: Sámi Art and Culture -čájáhusa rahpandilálašvuođas Somerset Houses Londonis Outi Pieski Duoddariid guovddáš / Layered Realities -dáiddaduoji bálddas. Dáiddaduodji lea čájáhusa várás diŋgojuvvon ođđa dáiddaduodji. Govva: Alisa Katajamaa.
Through Our Eyes: Sámi Art and Culture lea vuosttas Stuorra-Británnias ordnejuvvon sápmelaš dáidaga ja kultuvrra joavkočájáhus. Čájáhus čohkke oktii 19 sámedáiddára miehtá Sámi Suomas, Ruoŧas ja Norggas ja čalmmustahttá earret eará dáládáidaga, čuovgagovaid, videoid ja performánsadáidaga.
Čájáhusas leat dáiddaduojit sihke sámedáidaga pionearain ja dáládáiddáriin, earret eará Iver Jåksas, Nils-Aslak Valkeapääs, Britta Marakatt-Labbas, Marja Helanderis, Olof Marsjas ja Outi Pieskis. Čájáhusa leaba kurateren sápmelaš govvadáiddár Matti Aikio ja Somerset House čájáhusjođiheaddji Cliff Lauson. Aikio lea maiddái Sámedikki várrelahttu.
“Sápmelaš dáidaga ja min iežamet máilmmigova hálidit oaidnit eanet ah eanet miehtá máilmmi. Lea dehálaš ahte sámit ieža besset dáidaga bokte muitalit min kultuvrras ja buktit ovdan midjiide dehálaš gažaldagaid. Dáidaga bokte lea vejolaš gieđahallat ovdamearkka dihtii kolonialismma váikkuhusa sámiide ja sámekultuvrii”, dadjá Sámedikki ságadoalli Pirita Näkkäläjärvi.
Govvateaksta: Olof Marsja Mii Dáhpáhuvva Dáppe / What’s Happening Here? (2026) -dáiddaduoji oassi. Dáiddaduodji suokkardallá sámiid kolonialismma historjjá ja dan váikkuhusaid.
Čájáhus buktá sápmelaš dáiddáriid iežaset geahččanguovlluid riikkaidgaskasaš gehččiid olámuddui. Dáiddadujiin gieđahallojit earret eará sámiid historjá, kolonialisma ja eamiálbmogiid rievttit. Seammás čájáhus nanne sápmelaš dáidaga oinnolašvuođa riikkaidgaskasaččat ja čalmmustahttá sápmelaš máilmmigova dáidaga bokte.
Through Our Eyes: Sámi Art and Culture lea rabas Somerset Houses Londonis 6.11.2026–7.2.2027. Čájáhussii beassá nuvttá sisa.
Lassedieđut:
Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi
