Tiävdáh-uv 18 ihheed majemustáá 3.10.2027? Uuccâm sämitiggevaaljâi valjâluvâttâlmân nohá 30.9.2026
Sämitige saavâjođetteijee já Sämitige nuorâirääđi muštotteh, ete ive 2027 sämitiggevaaljâi valjâluvâttâlmân uuccâm nohá 30.9.2026. Ive 2027 sämitiggevaaljâin peesih jienâstiđ toh nuorah, kiäh tevdih 18 ihheed majemustáá vaaljâi majemuš peeivi 3.10.2027 já kiäh láá merkkejum valjâluvâttâlmân.
Sämitige mield eidu tääl lii eromâš tehálâš huolâttiđ tast, ete valjâluvâttâlmân ucâluveh ääigild puoh nuorah, kiäh finnejeh vuossâmuu tove jienâstemvuoigâdvuođâ, sehe eres nuorâ rävisulmuuh, kiäh iä vala lah ucâlum valjâluvâttâlmân.
– Mij tuáivup, ete Sämiaalmug movtijdit nuorâid ucâluđ valjâluvâttâlmân. Sáttá orroođ, ete čohčâmáánu loppâ lii vala kukken, mutâ tárbulijd äššikiirjijd kannat tiilááškyettiđ jo tääl, Sämitige saavâjođetteijee Pirita Näkkäläjärvi iätá.
Čuávuvááh sämitiggevaaljah láá 23.8.–3.10.2027. Sämitige saavâjođetteijeeh muštottii tolebáá keessiv valjáid kyeskee tehálijn peivimeerijn.
Tehálumos lii toimâttiđ ucâmuš meriääigi räi – ucâmuš puáhtá tievâsmittiđ maŋeláá
Valjâluvâttâlmân ucâlume meriäigi nohá 30.9.2026. Uuccâmluámáttâh já lasetiäđuh kávnojeh sijđoost: Ucâlum valjâluvâttâlmân já tast vyelgim.
Ucâmušân sáttá tarbâšiđ lahtosijd, tego virgetuođâštus. Jis occee ij lah vises tast, moh lahtosijd jieijâs ucâmušân annojeh, te valjâlävdikode toimâttâh rävvee lahtosij hahâmist.
– Valjâluvâttâlmân kannat uuccâđ, veikâ ij liččii aaibâs vises tast, láá-uv puoh tárbuliih tiäđuh jo čuáhist. Tehálumos lii toimâttiđ ucâmuš meriääigi räi. Jis miinii váilu, te valjâlävdikode toimâttâh pivdá occest lasečielgiittâs, saavâjođetteijee Näkkäläjärvi juátká.
Nuorâi jienâ kulloo, ko nuorah uásálisteh
Jienâvuoigâdvuotâ sämitiggevaaljâin addel máhđulâšvuođâ vaiguttiđ ohtsijd aššijd já sämisiärvus puátteevuotân. Meid Sämitige nuorâirääđi avžuut nuorâid uuccâđ valjâluvâttâlmân.
– Tääl lii tuu äigi ucâluđ valjâluvâttâlmân! Jis mij nuorah ep lah valjâluvâttâlmist, mij ep peesâ jienâstiđ já vaiguttiđ toos, maggaar puátteevuotâ mijjân já sämisiärvusân huksejuvvoo. Mii nuorâi jienâ kalga kulluđ meid vaaljâin, nuorâirääđi saavâjođetteijee Sárá-Márjá Keskitalo avžuut.
Nuorâirääđi paajeed čoovčâ ääigi valjâluvâttâlmân ucâlum oovdân jieijâs sosiaallii media kanavijn já avžuut nuorâid uásálistiđ ive 2027 sämitiggevaljáid.
Uuccâmluámáttâh já lasetiäđuh valjâluvâttâlmân ucâluumeest kávnojeh Sämitige vaaljâi nettisiijđoin jienâsteijeid čujottum uásist: https://vaalit.samediggi.fi/vaaljah/jienasteijei/
Valjâlävdikode toimâttâh rävvee valjâluvâttâlmân ucâluumân lohtâseijee koččâmušâin. Toimâttuv pargoviehâ västid sehe puhelin já šleđgâpoostâ peht oovdânpuohtum koččâmuššáid. Ohtâvuotâtiäđuh kávnojeh sijđoost https://vaalit.samediggi.fi/vaaljah/ohtavuodatiaduh/
Vaaljâi äigitaavlun puáhtá uápásmuđ taa: https://vaalit.samediggi.fi/vaaljah/samitiggevaaljah/aigitavlu/
