Teâudak-a 18 eeʹǩǩed mââimõõzzâst 3.10.2027? Ooʒʒõõttmõš sääʹmteʹǧǧvaali vaal-loǥstõʹǩǩe põõtt 30.9.2026
Sääʹmteeʹǧǧ saaǥǥjååʹđteeʹjj da Sääʹmteeʹǧǧ nuõrisuåvtõs muuʹštʼte, što eeʹjj 2027 sääʹmteʹǧǧvaali vaal-loǥstõʹǩǩe ooʒʒõõttmõš põõtt 30.9.2026. Eeʹjj 2027 sääʹmteʹǧǧvaalin peäʹsse jiõnsted tõk nuõr, kook teuʹdde 18 eeʹǩǩed mââimõõzzâst vaali mââimõs peiʹvven 3.10.2027 da kook liâ miõrkkumnalla vaal-loǥstõʹǩǩe.
Sääʹmteeʹǧǧ mieʹldd ååʹn lij samai vääžnai ââʹnned huõl tõʹst, što vaal-loǥstõʹǩǩe ooʒʒâʹtte ääiʹjeld puk vuõssmõs vuâra jiõnnvuõiggâdvuõđ õsttâm nuõr di jeeʹres nuõr, kook jiâ leäkku veâl ooʒʒõõttâm vaal-loǥstõʹǩǩe.
– Tuäivvap, što Sääʹm-meer smeʹllkâtt nuõrid ooʒʒõõttâd vaal-loǥstõʹǩǩe. Čõhččmannu lopp vuäitt tåbddjed veâl kuʹǩǩen, leša taarbšeei äʹššǩiiʹrjid kaʹnnat äʹlǧǧed tiʹllʼjed juʹn ååʹn, Sääʹmteeʹǧǧ saaǥǥjååʹđteeʹji Pirita Näkkäläjärvi särnn.
Puõʹtti sääʹmteʹǧǧvaalid jeäʹlet 23.8.–3.10.2027. Sääʹmteeʹǧǧ saaǥǥjååʹđteeʹjjkååʹdd muuʹštʼti ääiʹjab ǩeässa vaalid kuõskki vääžnai peiʹvvmeäʹrin.
Tääʹrǩmõs lij tååimtet mieʹrräigga mõõneeʹst – ooccmõõžž vuäitt tiuddeed mâʹŋŋlubust
Vaal-loǥstõʹǩǩe ooʒʒõõttmõõžž mieʹrräiʹǧǧ põõtt 30.9.2026. Ooccâmlomakk da lââʹssteâđ käunnʼje seeidast: Ooʒʒõõttmõš vaal-loǥstõʹǩǩe da tõʹst meädda ǩeässõõttmõš.
Ooccmõʹšše vuäitak taarbšed meâlddõõzzid, mâta veʹrǧǧtuõđštõõzz. Jõs oocci ij leäkku snäätnai tõʹst, måkam meâlddõõzzid ooccmõš taarbaš, vaal-luʹvddkååʹdd koontâr vuäʹppast meâlddõõzzi haʹŋǩǩummšest.
– Vaal-loǥstõʹǩǩe kaʹnnat ooccâd, håʹt-i ij leʹčči samai snäätnas tõʹst, liâ-a puk taarbšum teâđ juʹn norrum. Tääʹrǩmõs lij tååimted ooccmõš mieʹrräigga mõõneeʹst. Jõs mâid-ne veâl taarbše, vaal-luʹvddkååʹdd koontâr räukk ooʒʒjest lââʹssčiõlǥtõõzz, saaǥǥjååʹđteeʹjj Näkkäläjärvi juätkk.
Nuõri jiõnn kollai, ǥu nuõr vuässâʹtte
Jiõnnvuõiggâdvuõtt sääʹmteʹǧǧvaalin oudd vueiʹtlvažvuõđ vaaikted õhttsaž aaʹššid da sääʹmõõutstõõzz pueʹttiäigga. Še Sääʹmteeʹǧǧ nuõrisuåvtõs smeʹllkâtt nuõrid ooʒʒõõttâd vaal-loǥstõʹǩǩe.
– Ååʹn lij tuu äiʹǧǧ ooʒʒõõttâd vaal-loǥstõʹǩǩe! Jõs mij nuõr jeäʹp leäkku vaal-loǥstõõǥǥâst, jeäʹp piâzz jiõnsted da vaaikted tõõzz, måkam pueʹttiääiʹj miʹjjid da sääʹmõutstõʹsse raajât. Mij nuõri jiõn âʹlǧǧe kollʼjed še vaalin, nuõrisuåvtõõzz saaǥǥjååʹđteeʹjj Sárá-Márjá Keskitalo smeʹllkâtt.
Nuõrisuåvtõs kägg čõõuč poodd vaal-loǥstõʹǩǩe ooʒʒõõttmõõžž sosiaalʼlaž media kanaalin da smeʹllkâtt nuõrid vuässõõttâd eeʹjj 2027 sääʹmteʹǧǧvaalid.
Ooccâmlomakk di lââʹssteâđ vaal-loǥstõʹǩǩe ooʒʒõõttmõõžžâst käunnʼje Sääʹmteeʹǧǧ vaali neʹttseeidain čuäʹjtum vueʹzzest: https://vaalit.samediggi.fi/vaal/jionsteeja/
Vaal-luʹvddkååʹdd koontâr vuäʹppast vaal-loǥstõʹǩǩe ooʒʒõõttmõõžž kuõskki õhttneei kõõččmõõžžin. Konttâr tuâjjlažkåʹdd vaʹsttad nuʹt teʹlfoonin ǥu neʹttpååʹštin kõõjjuum kõõččmõõžžid. Õhttvuõđteâđ käunnʼje seeidast: https://vaalit.samediggi.fi/vaal/ohttvuodtead/
Vaali äiʹǧǧtauʹlle vuäitak tobdstõõttâd vaali äiʹǧǧkõõsk mieʹldd: https://vaalit.samediggi.fi/vaal/saamteggvaal/aiggtaull/
