Deavddátgo 18 jagi maŋimustá 3.10.2027? Ohcan sámediggeválggaid válgalogahallamii nohká 30.9.2026
Sámedikki ságajođiheaddji ja Sámedikki nuoraidráđđi muittuhit, ahte jagi 2027 sámediggeválggaid válgalogahallamii ohcan nohká 30.9.2026. Jagi 2027 sámediggeválggain besset jienastit dat nuorat, geat devdet 18 jagi maŋimustá válggaid maŋimus beaivve 3.10.2027 ja geat leat merkejuvvon válgalogahallamii.
Sámedikki mielde dál lea erenomáš dehálaš fuolahit das, ahte válgalogahallamii ohcet áiggil buohkat vuosttas háve jietnavuoigatvuođa juksi nuorat ja eará nuorra rávesolbmot, geat eai leat vel ohcan válgalogahallamii.
– Mii sávvat, ahte Sámeálbmot roahkasmahttá nuoraid ohcat válgalogahallamii. Sáhttá vel dovdot ahte čakčamánu loahppa lea guhkkin, muhto dárbbašlaš áššebáhpáriid gánneha álgit diŋgot juo dál, Sámedikki ságajođiheaddji Pirita Näkkäläjärvi dadjá.
Čuovvovaš sámedikkeválggat dollojit 23.8.–3.10.2027. Sámedikki ságajođiheaddjiidjoavku muittuhii árabut geassit válggaid guoski dehálaš beaivemeriin.
Dehálaš lea doaimmahit ohcamuša mearreáigái – ohcamuša sáhttá dievasmahttit maŋŋá
Válgalogahallamii ohcama mearreáigi nohká 30.9.2026. Ohcanskovvi ja lassidieđut gávdnojit siiddus: Ohcan válgalogahallamii ja das earráneapmi.
Ohcamuššii sáhttá dárbbašit čuvvosiid, dego virgeduođaštusa. Jus ohcci ii leat sihkkar das, maid čuvvosiid iežas ohcamuššii dárbbaša, válgalávdegotti doaimmahat rávve čuvvosiid háhkamis.
– Válgalogahallamii gánneha ohcat, vaikko ii livčče ollásit sihkkar das, leatgo buot dárbbašlaš dieđut juo čoahkis. Dehálamos lea doaimmahit ohcamuša ovdalgo mearreáigi nohká. Jus juoidá váilu, válgalávdegotti doaimmahat bivdá ohccis lassečilgehusa, ságajođiheaddji Näkkäläjärvi joatká.
Nuoraid jietna gullo, go nuorat oassálastet
Jietnavuoigatvuohta sámediggeválggain addá vejolašvuođa váikkuhit oktasaš áššiide ja sámeservoša boahtteáigái. Maiddái Sámedikki nuoraidráđđi movttiidahttá nuoraid ohcat válgalogahallamii.
– Dál lea du áigi ohcat válgalogahallamii. Jus mii nuorat eat leat válgalogahallamis, eat mii beasa jienastit ja váikkuhit, dasa makkár boahtteáigi midjiide ja sámeservošii huksejuvvo. Min nuoraid jienat galget gullot maiddái válggain, nuoraidráđi ságajođiheaddji Sárá-Márjá Keskitalo movttiidahttá.
Nuoraidráđđi lokte čavčča áigge ovdan válgalogahallamii ohcama iežas sosiála media kanálain ja movttiidahttá nuoraid oassálastit jagi 2027 sámediggeválggaide.
Ohcamušskovvi ja lassidieđut válgalogahallamii ohcamis gávdnojit Sámedikki válggaid neahttasiidduin jienasteaddjiide oaivvilduvvon oasis: https://vaalit.samediggi.fi/valggat/jienasteaddjai/
Válgalávdegotti doaimmahat rávve válgalogahallamii ohcamii gullevaš gažaldagain. Doaimmahaga bargoveahka vástida sihke telefovnnain ja e-poasttain ovdanbuktojuvvon gažaldagaide. Oktavuohtadieđut gávdnojit siiddus: https://vaalit.samediggi.fi/valggat/oktavuodadiedut/
Válggaid áigeplánii sáhttá oahpásmuvvat áigelinnjás: https://vaalit.samediggi.fi/valggat/samediggevalggat/aigeplana/
