Ucjuv kieldâ já Sämitigge ovdedeh oovtâstpargos
Ucjuv kieldâ já Sämitigge teivâdii oovtâstpargo ooleest Ucjuuvâst njuhčâmáánu 20. peeivi 2025. Teivâdem ulmen lâi lasettiđ ohtsii hiäđukocceem já ovdediđ oovtâstpargo.
Ucjuv kieldâ já Sämitigge teivâdii oovtâstpargo ooleest Ucjuuvâst. Kove: Ucjuv kieldâ / Suvi Spoof.
Sämitigge lii juátkám oovtâstpargočuákkimij ornim oovtâst sämmilij päikkikuávlu kieldâiguin. Tuorâstuv 20.3.2025 Ucjuv kieldâ já Sämitige ovdâsteijeeh teivâdii Ucjuuvâst. Teivâdem ulmen lâi ohtsii hiäđukocceem já oovtâstpargo ovdedem. Ohtsii hiäđukocceem čuosâttâhhân tubdâstii ei. káidusmáttááttâshaavâ fastâdem, Kiävu tutkâmsajattuv ovdedem já sämikielâlii nuorâipargo ovdedem.
Teivâdmist kieđâvuššii meid eres aašijd, moh láá äigikyevdileh Ucjuv kieldân já Sämitiigán. Oovtâst savâstâllii ei. äigikyevdilijn aašijn moh lohtâseh eennâmkevttimân, maađhâšmân já iäláttâssáid sehe säämi kielâlaavâ olášutmist já sämikielâlii nuorâipargoost. Lasseen vuávájii, ete maht ovdedeh ohtâvuođâ toollâm puátteevuođâst.
– Mun tuáivum, ete savâstâllâmohtâvuotâ Sämitiggijn siäilu nanosin, tastko mist láá ennuv ohtsiih intresseh eereeb iärrás hiäđukocemist, iätá Ucjuv kieldâhovdâ Päivi Kontio.
– Mun kijtám Ucjuv kieldâ pyeri teivâdmist. Oovtâstpargoteivâdmeh sämmilij päikkikuávlu kieldâiguin láá lamaš tuođâi teháliih, ko mist láá ennuv ohtsiih ääših, maid ovdediđ, iätá Sämitige vuossâmuš värisaavâjođetteijee Leo Aikio.
Čuákkimân uásálistii Ucjuv kieldâst váldustiivrâ saavâjođetteijee Arto Pohjanrinne, stiivrâ saavâjođetteijee Väinö Guttorm, kieldâhovdâ Päivi Kontio, pyereestvaijeemhovdâ Pirjo Seurujärvi, astoäigičällee Kaisa Tapiola-Länsman já viestâdem- já mađhâšemkoordinaattor Suvi Spoof sehe káidusohtâvuođáin eellimvyeimihovdâ Tanja Lepistö. Sämitiggeest pääihi alne čuákkimân uásálistii I värisaavâjođetteijee Leo Aikio, stiivrâ jeessân Asko Länsman, haldâttâhhovdâ Pia Ruotsala-Kangasniemi, iäláttâs- já pirâslahâčällee Sarita Kämäräinen, kielâtorvočällee Anne Kirste Aikio já vuávájeijee Kirsi Suomi. Káidusohtâvuođáin uásálistii saavâjođetteijee sajasâš Tuomas Aslak Juuso, lahâčällee Kalle Varis, nuorâičällee Elli-Marja Hetta, vs. iäláttâsčällee Maria Valkeapää já viestâdemčällee Johanna Alatorvinen.
Lasetiäđuh:
Ucjuv kieldâ
Päivi Kontio
kieldâhovdâ
040 744 7630
ovdânommâ.suhânommâ@utsjoki.fi
Sämitigge
Leo Aikio
I värisaavâjođetteijee
040 621 6505
leo.aikio@samediggi.fi
