Kielâoho ávus oppâtiijmeh puátih oppeet – teeman argâpeivi
Kielâokko viättoo 20.-26.10.2025. Sämikielâi káidusmáttááttâshaahâ uárnee oho kunnen ávus oppâtiijmijd, moid puáhtá servâđ kii peri. Kielâokko lii uárnejum vuossâmuu tove ive 2019, já káidusmáttááttâshaahân ávus oppâtiijmijn lii šoddâm jo ärbivyehi.
Oppâtiijmij fáddán lii argâpeivi. Jyehi sämikielân, moh Suomâst sárnojeh, ađai tavesämikielân, anarâškielân já nuorttâlâškielân, láá jieijâs oppâtiijmeh. Anarâškielâ tiijmest muštâlep jieččân argâpeeivist, tavesämikielâ tiijmest máttááttâllâp argâpeeivi eđâlduvâid já nuorttâlâškielâ tiijmest savâstâllâp argâpeeivi kietâtuojijn.
Oppâtiijmij ulmen lii lasettiđ tiäđu sämikielâin já siämmást sämikulttuurist. Oppâtiijmij čuásáttâhjuávkkun láá ovdâ- já vuáđumáttááttâs uáppeeh já nube tääsi uáppeeh, mutâ oppâtijmijd uážžuh uásálistiđ puohah, kiäid sämikielah kiäsutteh. Tun jieh taarbâš mättiđ ollágin sämikielâ vâi puávtáh uásálistiđ tijmijd. Tijmijd puáhtá uásálistiđ jieškote-uv uáppee jiešráđálávt teikâ oles luokka puáhtá uásálistiđ ohtsijn rustigáin. Jis haalijd, te puáhtá uásálistiđ veikâ puoh oppâtijmijd. Oppâtijmijd ij taarbâš almottâttâđ.
Oppâtiijmeh tuállojeh káidusohtâvuođâiguin Microsoft Teamsist.
Tiijmij äigitaavluh:
Majebargâ 21.10. tijme 9–9.45
Muu argâpeivi
Máttáátteijen Tuuli Paadar já Laura Ylinampa
Čuásáttâhjuávkku: 0.–3. luokah
Kielâ: Anarâškielâ
Servâmliŋkkâ: Seervâ čuákkimân spokkâlmáin täst
Koskokko 22.10. tijme 9–9.45
Argâpeeivi eđâlduvah
Máttáátteijen Joni Saijets, Laura Njunnas já Ida-Maria Helander
Čuásáttâhjuávkku: Paješkovlâ já nubbe tääsi
Kielâ: Tavesämikielâ
Servâmliŋkkâ: Seervâ čuákkimân spokkâlmáin täst
Tuorâstâh 23.10. tijme 9–9.45
Argâpeeivi kietâtyejeh
Máttáátteijen Sirkka Sanila já Kia Olin
Čuásáttâhjuávkku: 4.–6. luokah
Kielâ: Nuorttâlâškielâ
Servâmliŋkkâ: Seervâ čuákkimân spokkâlmáin täst
Tiijmij ääigi lii máhđulâš koijâdiđ já savâstâllâđ chatist. Oppâtiijmeh iä vyerkkejuu.
Ohtâvuotâulmuuh:
Hanna Helander proojeekthovdâ
hanna.helander@edu.utsjoki.fi
040 701 2094
Anne Olli, proojeektkoordinaattor
anne.olli@samediggi.fi
040 687 5989
Lasetiäđuh Sämikielâi káidusmáttááttâshaavâst:
Sämikielâi káidusmáttááttâs piiloothaahâ lii Ucjuv kieldâ jođettem já Sämitige koordinistem haahâ. Haavâ ruttâd máttááttâs- já kulttuurministeriö. Haavâ ulmen lii faallâđ sämikielâ káidusmáttááttâs vuáđuškoovlâ já nube tääsi uáppeid sämikuávlu kieldâi ulguubel kyehti okkotiijme verd já ovdediđ sämikielâi káidusmáttááttâs pedagogiik. Káidusmáttááttâshaavâ máttááttâs lii reaaláigásâš (synkroonlâš) máttááttâs. Talle máttáátteijee já uáppeeh uásálisteh siämmáá ääigi oppâtijmijd jieijâs piergâsijguin, mutâ fyysilávt sierâ paaihijn.
https://www.saamenetaopetus.com/
Lasetiäđuh sämikielâi ohhoost:
Kielâoho ulmen lii pyerediđ sämikielâi sajattuv, já pyerediđ sämikielâi já sämikulttuur tubdâm ubâ ohtsâškoddeest. Eidu taan ohhoost kalgeh sämikielah kullojeh já uáinojeh jyehi saajeest.
Kielâokko lii ohtsâšhaahâ, main mij pyehtip oovdân sämikielâid já lasettep tai tubdâm oles ohtsâškoddeest. Priivaat já almos lájádâsah, finnoduvah, seervih já jieškote-uvlágán uásálisteeh puávdejuvvojeh pyehtiđ oovdân sämikielâid eidu taan ohhoost. Oovtâst mij väldip stuárráb ovdâsvástádâs sämikielâi kulluumist, oinuumist já kevttimist puoh siärvádâhsuorgijn.
Taažâ Sämitigge lii algâttâm Kielâoho já tot lii uási sii algâttem Kielâluptim (Giellalokten) kielâstrategia.
