Sämikielâlij oppâmaterialij pyevtittem ruttâdem juátkoo siämmáá tääsist ive 2027 staatâ budjetiävtuttâsâst

Suomâ ruátálii aalmugpiäláduv (RAP) almostittem tiäđui mield Suomâ haldâttâs meridij budjetráđádâlmijn čohčâmáánu 1. peeivi siskálmittiđ ive 2027 budjetiävtuttâsân iävtuttâs sämikielâlij oppâmaterialij ruttâdem siäilutmist ive 2026 tääsist ađai 800 000 eurost. Ive 2027 budjetiävtuttâs adeluvvoo ovdâskoodán staatârääđi almosčuákkimist  čohčâmáánu 21. peeivi já almostittoo tast maŋa čujottâsâst budjetti.vm.fi.

Algâaalgâst ive 2027 budjetiävtuttâsâst iävtuttii kepidiđ sämikielâlii oppâmaterialpyevtittem meriruuđâ 200 000 euroin. Koččâmušâst ličij lamaš merhâšittee 25 prooseent čuoppâm tiileest, mast sämikielâlij oppâmaterialij tárbu šadda ohtânmaanoost.

Sämitiggeest já sämikuávlu kieldâin ađai Iänuduv, Aanaar, Suáđigil já Ucjuv kieldâin lii ohtsâš uáinu oppâmaterialpyevtittem tehálâšvuođâst puoh kuulmâ Suomâst ellee sämikielâ ađai nuorttâlâš-, anarâš- já orjâlâškielâ máttááttâsân.

– Taat lii tehálâš já ovdâsvástádâslâš čuávdus. Pyere tääsi oppâmaterialeh láá kuávdáš iähtu sämikielâi máttááttâs meritiätulii oovdedmân. Miärádâs tuárju párnái já nuorâi máhđulâšvuođâid oppâđ já kevttiđ jieijâs kielâ argâpeeivi, iätá Sämitige saavâjođetteijee Pirita Näkkäläjärvi.

Sämitigge já sämikuávlu kieldah keččâlii vaiguttiđ budjetproosees ääigi oovtâst sämikielâlii oppâmaterialmeriruuđâ siäilumân. Sämitigge já sämikuávlu kieldah kijtteh máttááttâs- já kulttuurminister Anders Adlercreutz sehe staatârääđi ruttâdem huolâtmist ihán 2027.

Sämitiggeest lii väldikodálâš ovdâsvástádâs sämikielâlii oppâmaterialpyevtittem oovdedmist puoh kuulmâ Suomâst ellee sämikielân: nuorttâlâš-, anarâš- já orjâlâškielân.

– Lii tehálâš, ete sämikielâlij oppâmaterialij pyevtitmist puoh kuulmâ Suomâst ellee sämikielân puáhtá ovdediđ meritiätulávt nuuvt digitaallii ko meid teddilum häämist. Taat váátá staatâst čonâdâttâm tuárvi stuorrâ ruttâdmân, iätá Sämitige nubbe värisaavâjođetteijee Tuomas Aslak Juuso.

Sämikuávlu kieldâin lii máttááttâs uárnejeijen ovdâsvástádâs sämikielâi máttááttâs já sämikielâlii máttááttâs orniimist.

– Oppâmaterialeh láá máttááttâs vuáđuiähtu. Staatâ kalga tähidiđ oppâmaterialij finnim, vâi sämikielâi máttááttâs já sämikielâlii máttááttâs puáhtá orniđ kvaliteetlávt, oovtviärdásávt já máttááttâsvuáváámij mield, pahudeh sämikuávlu kieldâhoovdah.

Oppâmaterialeh annojeh nuorttâlâš-, anarâš- já orjâlâškielâ máttááttâsâst pirrâ Suomâ.  Sämikielâ luuvâi tâi sämikielâlii máttááttâsâst lijjii luuhâmive 2025–2026 ohtsis 823 uápped ovdâmáttááttâsâst luvâttâhân pirrâ Suomâ. Uáppeemere stuárrum já káidusmáttááttâs lasanem tiädutteh sämikielâlij oppâmaterialij šaddee táárbu.

Sämitigge já sämikuávlu kieldah juátkih oovtâstpargo oppâmaterialruttâdem ovdedem várás puátteevuođâst, vâi puoh sämipárnáin já -nuorâin lii máhđulâšvuotâ oppâđ já kevttiđ jieijâs kielâ.

Lasetiäđuh:

Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi

Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi

Eero Ylitalo
Kieldâhovdâ, Iänuduv kieldâ
040 5704073
eero.ylitalo@enontekio.fi

Tommi Kasurinen
Kieldâhovdâ, Aanaar kieldâ
050 548 4123
tommi.kasurinen@inari.fi

Jari Rantapelkonen
Kieldâhovdâ, Suáđigil kieldâ
040 615 9880
jari.rantapelkonen@sodankyla.fi

Päivi Kontio
Kieldâhovdâ, Ucjuv kieldâ
040 744 7630
paivi.kontio@utsjoki.fi