Sämimuusik konserteh stream-vuolgâttâssân Sajosist
Sämitige säämi muusikkuávdáš já säämi kulttuurkuávdáš Sajos uárnejeh livestream-konsertij rááiđu kesimáánust. Konserteh vuolgâttuvvojeh stream-vuolgâttâssân säämi kulttuurkuávdáš Sajosist, Anarist já toi čuávvum lii nuuvtá. Saje oolâ ep vääldi ulmuid. Konsertijd puáhtá čuávvuđ čujottâsâst sajos.fi/live.
Konsertij rááiđu aalgât koskoho 10.6. nuorttâlâškielâlâš Suõmmkar-juávkku. Suõmmkar ovtâstit puáris nuorttâlâš ärbivyehimuusik tááláá maailmmuusikân. Juávhust lávluh já leuddajeh nuorttâliih Anna Lumikivi já Hanna-Maaria Kiprianoff, kiäh lává váldám suvâidis kielâ já kulttuur maassâd eskân rävisolmožin já lává máttááttâllâm aalmugis muusikärbivyevi arkkâduvâi stivrim mield. Juávkku almostitij deebyytalbumis Suõmmkar porgemáánust 2018, já lii eidu rähtimin nube album.
Tuorâstuv 11.6. lii Ulla Pirttijärvi-Länsman konsert oovtâst Ulda-juávhoin. Pirttijärvi-Länsman lii ohtâ tobdosumos sämimusijkkár eromâšávt ärbivuáválii vookaalmuusik, juáigus syergist já juáigus lii nanosávt mieldi meid Ulda muusikist. Juávkku lii vuáđudum ive 2009 já tot lii almostittâm kyehti album; Ulda (2012) já Roijk (2016). Kuálmád album lii pargo vyelni.
Koskoho 17.6. láávdást Ante Aikio juávhuinis. Aikio lii aanaarlâš musijkkár já kirječällee, kote lii almostittâm maaŋgâid kirjálijd tuoijijd já lii juoigâm almolávt jo iivijd. Sun lii kollim Korpiklaani-juávhu njunošalmaa Jonne Järvelä kyevti sooloalbumist já lávdástâm Saimaa Sinfonietta -orkester jyeigen. Moonnâm keesi sun almostitij suu vuossâmuu persovnlii single, Šuvvá, mon pyevtittij ruátálâš ráppájeijee Kitok. Vyesimáánust 2020 Aikio almostitij deebyytalbumis Eret.
Konsertij rááiđu looppât 24.6. Wimme & Rinne. Wimme Saari já Tapani Rinne lává ráhtám muusik oovtâst jo niäljádâsihečyeđe ääigi já lává jottáám láávdástmin sierâ nanamijn. Ustevij táálááš čuákánpiejâm lii duo, Wimme & Rinne, kost kuohtui persovnij tuávvááh já hárjánem ovtâstuveh. Puáđusin lii herkis já vuáimálâš muusik, mii lii mieldi tääbbin já tääl.
Puoh konserteh älgih tme 19.00 já taid puáhtá čuávvuđ čujottâsâst sajos.fi/live.
Konserteh:
10.6. Suõmmkar
11.6. Ulla Pirttijärvi & Ulda
17.6. Ante Aikio
24.6. Wimme & Rinne
Lasetiäđuh:
Säämi muusikkuávdáá vuávájeijee
Oula Guttorm
oula.guttorm(at)samediggi.fi
040 6674545
