Sämitige valjâlävdikodde ocá oovdânpyehteečällee

Oovdânpyehteečällee pargon lii Sämitige valjâlävdikode vuálásâžžân toimâđ aašij valmâštellen já oovdânpyehten, huolâttiđ ive 2027 sämitiggevaaljâi valmâštâlmân já olášutmân lohtâseijee pargoin sehe puoh eres pargoin, maid valjâlävdikode čällee sierâ sunjin meerrid.

Palvâluskoskâvuođâ tiäđuh

Meriáigásâš virge álgá sopâmuš mield uđđâive-kuovâmáánust já juátkoo 31.12.2026 räi. Máhđulii joođhâst suáppoo sierâ. Virgekoskâvuođâ tevdimist nuávdittuvvoo neelji mánuppaje keččâlemäigi.

Valjâlävdikode toimâsaje lii Säämi kulttuurkuávdáš Sajosist, Anarist. Pargo váátá porgâm Sajosist.

Occest mij vyerdip

Asâttâsân vuáđuduvvee tohálâšvuođâvátámâššân lii viirgán hiäivulâš škovlim já sämikielâ máttu (asâttâs 1727/95). Hárjánem valjâlävdikode pargoost annoo hiättun.

Virge miänástuvvee hoittám váátá hiäivulii ollâškovlâtotkos, šiev haaldâtlij pargoi tubdâm, kiärgusvuođâid jiečânâs porgâmân, šiev ornijdemnaavcâid já streesi kierdâm, sehe čielgâ kirjálii viestâdemtááiđu suomâkielân.

Pälkki

Pälkki miärášuvá Sämitige pälkkivuáháduv vátávâšvuotâtääsi IV já tast II juávhu mield (vuáđupälkki 2998,82 eurod/mp).  Vuáđupäälhi lasseen máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh.

Uuccâm

Uuccâmluámáttuv, rijjâtátulii rijjâhámásii uuccâmreeivâ sehe máhđulii ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 11.1.2026 räi taan šleđgâlii uuccâmluámáttuv peht (lekkâs uđđâ laasân): Uuccâmluámáttâh

Lasetiäđuid pargoost adelává valjâlävdikode čällee Maria Valkeapää puh. 040 530 9513, valjâlävdikode oovdânpyehteečällee Sinikka Mäkinen, puh. 044 705 7160.

Sämitige tooimân puáhtá uápásmuđ nettičujottâsâst www.samediggi.fi

Anarist 18.12.2025
Sämitigge