Sämitigge ij tuhhiittâm oovdânpyehtimhammiittâs sämitiggelaavâ nubásmitmân

Vijđes savâstâllâm maŋa Sämitige čuákkim hilgoi haldâttâs oovdânpyehtimhammiittâs sämitiggelaavâ nubásmitmân. Čuákkim jienâstij miärádâsâst kulmii. Majemužžân jienâstii stiivrâ iävtuttâsâst hilgođ oovdânpyehtimhammiittâs já Jan Saijets iävtuttâsâst vaattâđ toohâđ nubástusâid oovdânpyehtimhammiittâsân puáđusin 11 – 8 (ohtâ kuárus jienâ).

Sämitiggelaavâ hástuseh sehe nubástustáárbuh láá maaŋgâin oosijn lamaš tiäđust joba laavâ asâttem rääjist. Sämitige prioriteettin lii lamaš jo maaŋgâ vaaljâpaje uđâsmittiđ laavâ Sämitiggeest. – Mij kijttep sämitiggelaavâ nubásmittem valmâštâllâm toimâkode pargostis sehe puoh peelijd, moh láá uásálistám laavâ uđâsmitmân, aalgât saavâjođetteijee Tiina Sanila-Aikio vuáđustâsâin oovdânpyehtimhammiittâs hilgom uásild.

– Sämitiggelaavâ puáhtá anneeđ sämmilij vuáđulaahân. Tot lii sämmilij suvereniteet symbol sehe mij jieččân kielân já kulttuurân kyeskee jiešhaldâšem vuáđu. Sämisiärvádâh já Sämitige lävdikodeh láá lahâhammiittâs uáinim maŋa adelâm noonâ uáinu laavâ siskáldâs tehálumosijn vááijuvvuođâin nuuvt staatân ko meid Sämitige stiivrân, juátká Sanila-Aikio.

Lahâoovdânpyehtim tehálumoseh hástuseh lijjii 3 § vuáimánšoddâm sirdem, 26 § njuolgimlävdikode čuákánpieijâm já nomâttemvyehi, 9 § sänihäämi sehe 10 § čuákánpieijâm. Luuvâ puoh vuáđustâsâid täst (suomâkielân).

Sämitige čuákkim ráđádâlâi kuhháá ovdil miärádâstoohâm

Sämitige stivrâ oovdânpuovtij čuákkimân lahâoovdânpyehtim hilgom, ko tot oonij, ete sämitiggelaavâ 9 § miäldásâš ráđádâllâmkenigâsvuotâ ij olášum ääšimiäldásávt. Oovdânpyehtim finnij kuhes ráđádâlmij maŋa čuákkimist kulmâ vuástáiävtuttâs: 1) Anu Avaskari iävtuttâs tuhhiittiđ sämitiggelaavâ nubástusâiguin, 2) Pentti Pieski iävtuttâs tuhhiittiđ lahâoovdânpyehtim já 3) Jan Saijets iävtuttâs vaattâđ toohâđ nubástusâid oovdânpyehtimhammiittâsân. Čuákkim meridij jienâstiđ iävtuttâsâi oornig miäldásávt, Sämitige stiivrâ iävtuttâs hilgođ lahâhammiittâs lâi vuáđuiävtuttâssân.

Vuossâmuu jienâstem vuoitij Pentti Pieski iävtuttâs tuhhiittiđ lahâoovdânpyehtim jienâiguin 3 – 5 (kuárus 12). Nube jienâstem vuoitij Jan Saijets iävtuttâs vaattâđ toohâđ nubástusâid oovdânpyehtimhammiittâsân jienâiguin 3 – 7 (kuárus 10). Kuálmád já majemuu jienâstem vuoitij stiivrâ iävtuttâs hilgođ lahâoovdânpyehtim jienâiguin 11 – 8 (kuárus 1).

Sämitige čuákkim meridij jienâstem maŋa hilgođ sämitiggelahâoovdânpyehtim. Miärádâsâst  spiekâsteijee uáivil kuođđii Kari Kyrö, Anu Avaskari, Pigga Keskitalo já Pentti Pieski. Lasseen Tiina Sanila-Aikio piivdij lahteđ pevdikiirján vuáđustâsâid oovdânpyehtimhammiittâs hilgom uásild.

Jienâstemluvâttâllâm

Jienâstem 1
Jaa: Anu Avaskari iävtuttâs tuhhiittiđ sämitiggelaavâ nubástusâiguin
Ei: Pentti Pieski iävtuttâs tuhhiittiđ lahâoovdânpyehtim

Jienâstem 2
Jaa: Pentti Pieski iävtuttâs tuhhiittiđ lahâoovdânpyehtim
Ei: Jan Saijets iävtuttâs vaattâđ toohâđ nubástusâid oovdânpyehtimhammiittâsân

Jienâstem 3
Jaa: Sämitige stiivrâ iävtuttâs hilgođ lahâhammiittâs
Ei: Jan Saijets iävtuttâs vaattâđ toohâđ nubástusâid oovdânpyehtimhammiittâsân

Lasetiäđuh:

Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi