Sämitigge já Laapi pyereestvaijeemkuávlu savâstâllii sämikielâlijn já kulttuurmiäldásijn soti-palvâlusâin jyehi-ivvááš ráđádâlmist
Sämitige já Laapi pyereestvaijeemkuávlu ovdâsteijeeh teivâdii Ruávinjaargâst 9.6.2026 jyehi-ivvááš ráđádâllâm ooleest. Laapi pyereestvaijeemkuávlu haldâttâhnjuolgâdus mield pyereestvaijeemkuávlu ráđádâl Sämitiggijn jyehi ive pyereestvaijeemkuávlu ornim sämikielâlij já kulttuurmiäldásij palvâlusâi orniimist, oovdedmist já toid lohtâseijee oovtâstpargoost, uulmijn já pargojuávust.
Taan ive ráđádâlmist kieđâvuššii eereeb iärrás aašijd, moh tiäduttuvvojeh sämikielâlij palvâlusâi oovdedmist ive 2027, tilekejâstuv pyereestvaijeemkuávlu ekonomia vuáháduttemtooimâin sehe oovtâsttoimâm- já ráđádâllâmproosees oovdedmist.
– Šiev já olmâáigásâš oovtâstpargo nuuvt valmâštâlmist ko meid miärádâstohâmist lii tehálâš, vâi mij pastep turviđ sämikielâlijd já kulttuurmiäldásijd palvâlusâid oovtâviärdásávt. Ávus vuárusavâstâllâm iššeed meid nanodiđ luáttámuš já reagistiđ nubástussáid ääigild, paahud Sämitige II värisaavâjođetteijee Tuomas Aslak Juuso.
Jyehi-ivvááš ráđádâlmist savâstâllii meid ohtsijn hiäđukocceem uulmijn. Sehe Sämitigge já Laapi pyereestvaijeemkuávlu tiädutteh, ete palvâlusâi meritiätulâš ovdedem váátá tooimâid meid staatâ tääsist, eromâšávt sämikielâlij palvâlusâi ruttâdem nanodem já pargei finnim pyeredem várás.
– Laapi pyereestvaijeemkuávlu lahâaasâtlâš pargo lii tuárjuđ sämikielâlij sosiaal- já tiervâsvuođâhuolâttâs palvâlusâi ovdedem oles enâmist. Tuárvi stuorrâ já stäđis ruttâdem taan pargo hoittám várás lii tehálâš ohtsâš hiäđukocceemulme, paahud pyereestvaijeemkuávlujođetteijee Jari Jokela.
Laapi pyereestvaijeemkuávlust ráđádâlmân uásálistii pyereestvaijeemkuávlujođetteijee Jari Jokela, kááijumjođetteijee Markus Aarto, toorjâpalvâlusâi toimâsyergijođetteijee Mikko Häikiö, sosiaal- já tiervâsvuotâpalvâlusâi toimâsyergijođetteijee Miia Palo, sotikuávdášpalvâlusâi ovdâsvástádâssyergijođetteijee Antti Alaräisänen, sämikielâlij já kulttuurmiäldásij palvâlusâi ovdâsvástádâsohtâdâhjođetteijee Tuuli Miettunen sehe sämikielâlij já kulttuurmiäldásij palvâlusâi palvâlushovdâ Kati Mikkola. Sämitige ovdâsteijen ráđádâlmist lijjii II värisaavâjođetteijee Tuomas Aslak Juuso, sosiaal- já tiervâsvuotâlävdikode värisaavâjođetteijee Ulla Maarit Magga, vs. sosiaal- já tiervâsvuotâaašij sierânâsäššitobdee Anni Koivisto sehe II värisaavâjođetteijee sierânâsišedeijee Minna Näkkäläjärvi.
Lasetiäđuh:
Tuomas Aslak Juuso
II värisaavâjođetteijee
+35840 687 3394
Jari Jokela
pyereestvaijeemkuávlujođetteijee
+35840 532 3998
