Sämitigge pivdá iävtuttâsâid Sämmilij tuotâvuotâ- já sovâdâttâmkomissio jesânin

1. Pivdem iävtuttâsâin

Sämitigge pivdá sämisiärváduvâst iävtuttâsâid Sämmilij tuotâvuotâ- já sovâdâttâmkomissio jesânin ađai komissaarin, kiäid siärvádâh ana hiävulâžžân tooimân. Komissiost kalgeh leđe jesâneh, kiäin lii eromâš máttu sämmilij eellimtiilijn, kielâst já kulttuurist. Iävtuttâsâid kalga vuáđustâllâđ. Toos lasseen iävtuttum ulmui mietâmâš tooimân kalga visásmittiđ muuneeld tienuuvt, ete iävtuttum olmooš tiävdá lahtosin orroo luámáttuv.

Iävtuttâsâid pivdeh 3.4.2020 räi jo-uv poostâ peht Sämitigge, Sajos, 99870 AANAAR tâi šleđgâpoostâ peht info@samediggi.fi.

2. Komissio sajattâh, asâttem, čuákánpiejâm

Sämmilij tuotâvuotâ- já sovâdâttâmkomissio lii pargostis jiešmerideijee já jiečânâs. Staatârääđi aasât komissio čapo ohtsâšpargoost Sämitiggijn já Nuorttâlij sijdâčuákkimáin. Komissiost láá 5 komissaar. Komissaarijn 2 väljejuv staatârääđi iävtuttâsâst, 2 väljejuv Sämitige iävtuttâsâst já 1 Nuorttâlij sijdâčuákkim iävtuttâsâst. Sämitigge uárnee ovdil miärádâstoohâm kulâmijd iävtuttum komissaarij valjiimist. Sämitige čuákkim meerrid kyevti komissaar iävtutmist staatârááđán.

Tuotâvuotâ- já sovâdâttâmkomissio jesâneh láá ulmuuh, kiäid lii vijđes luáttámuš sehe sämmilii já syemmilii siärváduvâst. Jesâneh láá jiešmerideijeeh ege oovdâst ton uásipele, mii lii sii iävtuttâm teikâ valjim. Komissio noomâtmist väldih täsipiälásávt huámášumán jieškote-uv säämi kielâjuávhuid. Komissio noomâtmist viggeh väldiđ huámášumán suhâpelij täsipiälásii ovdâstem.

3. Komissio pargoh

Tuotâvuotâ- já sovâdâttâmproosees ulmen lii tubdâđ já árvuštâllâđ historjálii já tááláá olgoštem, meiddei staatâ suddâdempolitik, sehe vuoigâvuođâi luávkkimijd, čielgâdiđ maht toh vaigutteh sämmiláid já sii siärvádâhân tááláá tiileest já iävtuttiđ, maht sämmilij já Suomâ staatâ koskâsii sehe sämmilij koskânâs ohtâvuođâ puávtáččij ovdediđ. Tuotâvuotâ- já sovâdâttâmproosees ulmen lii lasettiđ tiäđulâšvuođâ sämmilijn Suomâ algâalmugin. Ulmen lii meiddei, ete tuotâvuotâ- já sovâdâttâmproosees puáđusin Suomâ staatâ váldá ovdâsvástádâs já nanosmit sämmilij vuoigâdvuođâi olášume Suomâst oovtâst Sämitiggijn, Nuorttâlij sijdâčuákkimáin já eres sämmilâštuáimeiguin.

Komissio pargo ulmen lii čokkiđ sämmilij feerimijd Suomâ staatâ já eres virgeomâhái tooimâin já tast, magareh vaikuttâsah já čuávumušah toin láá lamaš já ain láá sämmiláid algâalmugin já ton jesânáid ohtâgâssân, já pyehtiđ taam tiäđu uáinusân.

Tuotâvuotâ- já sovâdâttâmkomissio kalga rähtiđ pargostis raapoort, mii tuálá sistees meiddei toimâiävtuttâsâid. Tuotâvuotâ- já sovâdâttâmkomissio raapoort adeluvvoo staatârááđán, Sämitiigán já Nuorttâlij sijdâčuákkimân majemustáá 30.11.2022.

Komissio väljee juávhustis saavâjođetteijee. Komissio puáhtá sundediđ tooimâs já ornijduđ ton pyeremussân uáinim vuovvijn já vuáđudiđ ovdâmerkkân pargojuávhuid tâi juáhusijd jieijâs toimânkoččom já toos adelum mittomeerij olášuttem várás. Komissio väljee olssis uáivičällee já eres máhđulijd čäällimkode jesânijd.

Staatârääđi kanslia čuujoot komissio tooimân meriruuđâ.

4. Lasetiäđuh

Sämmilij tuotâvuotâ- já sovâdâttâmkomissio mandaat puáhtá luuhâđ tääbbin. Lasetiäđuid addel Sämitige haldâttâhhovdâ Pia Ruotsala-Kangasniemi puh. 040 726 2688 já šleđgâpostâ pia.ruotsala(at)samediggi.fi