Sämitigge uárnee tuotâvuotâ- já sovâdâttâmpargo jotkâpaargon lohtâseijee savâstâllâmtilálâšvuođâid sämiservijd
Sämitigge uárnee čoovčâ ääigi savâstâllâmtilálâšvuođâid uássin sämmilij tuotâvuotâ- já sovâdâttâmkomissio loppâraapoort jotkâpargo. Tilálâšvuođah láá uáivildum sämiseervij ovdâsteijeid já jesânáid.
Sämiservijd uáivildum puávdejum kuosij tilálâšvuođâin ulmen lii adeliđ saje ohtsii savâstâlmân, mast pyehtip oovtâst smiettâđ sovâdâttâm máhđulâšvuođâid, táárbuid já iävtuid sämisiärvus siste.
– Savâstâllâmtilálâšvuođâi ulmen lii kuullâđ sämisiärvus uáinuid tast, moi iävtuiguin sovâdâttâmpargo kolgâččii juátkiđ tuotâvuotâ- já sovâdâttâmkomissio loppâraapoort maŋa, já faallâđ máhđulâšvuođâ ohtsii savâstâlmân sovâdâttâm merhâšuumeest sämiaalmugân, iätá Sämitige saavâjođetteijee Pirita Näkkäläjärvi.
Saavâjođetteijee Näkkäläjärvi liäkká tilálâšvuođâid. Pääihi alne láá meid Sämitige stiivrâ ovdâsteijeeh kuldâlmin siärvus uáinuid já servâmin savâstâlmân. Lasseen mieldi láá tuotâvuotâ- já sovâdâttâmaašij äššitobdeeh tolâmin algâsaavâid já taiđâliih oovdânpyehtimeh movtijditmin savâstâlmân. Uásálistem lii máhđulâš káidusin.
Tilálâšvuotân láá puávdejum sämiseervij ovdâsteijeeh já jesâneh, iäge toh lah áávus eres ulmuid.
Sämitigge parga eidu tuotâvuotâ- já sovâdâttâmkomissio loppâraapoort iävtuttâsâi ovdedem oovdân. Savâstâllâmtilálâšvuođah láá uási taan pargoost, ko toh noreh oohtân sämisiärvus uáinuid sovâdâttâmpargo juátkimist já ton puátteevuođâst. Sämitigge savâstâl tuotâvuotâ- já sovâdâttâmpargoost meid ovdâmerkkân Nuorttâlij sijdâčuákkimáin, Sämipalgâseh rs:jn, sämikuávlu palgâsijguin já Tiänu uásálâškudijguin.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
