Sämmilii puásuituálu tuárjum kirjejum Euroop komissio miärádâsân - ”Historjálâš tábáhtus”
Euroop komissio olášuttemmiärádâsân lii valdum vuossâmuu tove kirjim, mon vuáđuld Suomâ staatâst lii puátteevuođâst máhđulâšvuotâ ruttâdiđ tooimâid, moiguin tuárjuh algâaalmug sämmilij puásuituálu.
Kove: Tarja Länsman / Sämitigge
Euroop komissio adelij 9.12.2025 uđđâ olášuttemmiärádâs, mii kuáská poccui já puásuipyevtittâsâi pyevtitmân sehe käävpi tolâmân Suomâst mieđettum aalmuglij torjui tiptemân(C(2025) 8458 final). Šoŋŋâtiilij já elleetaavdâi puásuituálun tovâttem vahâgij sajanmäksimân já sämmilij puásuituálu tuárjoo toimáid kyeskee toimâluokan lii väridum ohtsis 10 miljovn euro ihásâš meriruttâkáttu.
– Taat lii historjálâš tábáhtus sämmilii puásuituálun. Taat kirjim addel mijjân tuáivu tast, ete meid Suomâ staatâst lii haalu ovdediđ uđđâ toorjâvuovijd sämmilij puásuituálu eellimvuáimálâšvuođâ ovdedem várás. Mun halijdâm-uv kijtteđ eennâm- já meccituáluministeriö tast, ete sij láá ovdedâm mii ääši meid Euroop komissio kuávlun já návt olášuttâm meid puásuituálu puátteevuotâpargojuávhu loppâraapoort avžuuttâsâid, paahud Sämitige saavâjođetteijee sajasâš Tuomas Aslak Juuso.
Sämitigge tiäddut, ete staatâ kalga tähidiđ tuárvi ruttâdem, vâi Euroop komissio olášuttemmiärádâs kirjim puáhtá tääl tuođâi olášutškyettiđ sämmilii puásuituálust. Staatâ kalga meid ájáttâlhánnáá algâttiđ aktiivlii vuárusavâstâllâm já oovtâstpargo Sämmilij päikkikuávlu palgâsijguin, Sämipalgâseh rs:jn já Sämitiggijn tast, maht miärádâs puávtáččii puoh pyeremusávt olášuttiđ aalmuglii tääsist.
– Veikâ sämmilii puásuituálu toorjâtoimáid kyeskee kirjim lii tääl finnejum Euroop komissio olášuttemmiärádâsân, pargo ton olášuttem oovdân álgá tuođâi eskân tääl. Ääši ovdedem tuárju njuolgist meid eidu almostittum sämmilij tuotâvuotâ- já sovâdâttâmkomissio raapoort toimâiävtuttâsâid puásuituálu uásild, juátká Juuso.
Siämmáá olášuttemmiärádâsâst Euroop komissio pajedij stuorrâpiäđui tovâttem vahâgij sajanmáksukáátu 10 miljovnist 12 miljovn euron, sehe ärbivuáválij puásuituáluvuáháduvâi investistemtorjui já paijeentolâmân väridum aalmuglii meriruuđâ enâmusmere 2,4 miljovn euron. Sämitige uáinu mield paajeedmeh aalmuglij meriruuđâi enâmusmeerijd láá olmâ sundásiih, mutâ iä tuárvi ovdâmerkkân ton háárán, maht stuorrâpiäđui tovâttem vahâgeh láá ovdánâm majemui iivij ääigi.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Laura Olsén-Ljetoff
Iäláttâsčällee
040 617 5113 / 010 839 3123
laura.olsen-ljetoff@samediggi.fi
