Säminuorâi taaiđâtábáhtus uárnejuvvoo Heta škoovlâst kiđđuv 2027

Säminuorâi taaiđâtábáhtus uárnejuvvoo Heta škoovlâst Iänuduvâst oovtâstpargoost Iänuduv kieldáin tuorâstuv 29.4.2027. Iänuduv kieldâ tiävdá puáttee ive 150 ihheed já Säminuorâi taaiđâtábáhtusâst lii kunnee leđe uási sii juhleive tábáhtuskalenderist. Tábáhtus movtijdit párnáid já nuorâid puđâldiđ sierâ taaiđâsuorgijn sehe ovdediđ jieijâs tááiđuid.

Saamelaisnuorten taidetapahtuma
Kove: Sämitigge / Johanna Alatorvinen

Tábáhtus taaiđâšlaajah puáttee ive taaiđâtábáhtusâst láá teatter, naamar já čuovâkuvvim. Nuorah finnejeh máhđulâšvuođâ čäittiđ táiđuidis láávdástmist já oovdânpyehtiđ kuvijdis čáitálduvâst. Almottâttâm tábáhtusân lekkâs algâivveest 2027.

Taaiđâtábáhtus teemah ive 2027

Teemah teatter já naamar láá ohtsiih puoh ahejuávhoid. Čuovâkuvvim lii juohhum kuulmâ sierâ ahejuávkun ja teeman.

TEATTER

Uásálisteeh rähtih lávdástem, mii puáhtá vuáđuduđ sämimainâsân, páihálii áášán, klassiklii párnáimainâsân tâi aaibâs uđđâ kietâčallui. Teatter šlaajân puáhtá leđe ovdâmerkkân komedia, kiäldusvuotâ, draama, monolog, improvisistem, pantomiim, tanssâteatter tâi miinii eres teatter lávdástemhaamijd. Jieijâs lávdástem káárvuin já čájáttâssaje huksiimist västid lávdásteijee juávkku jieš ovdil lávdástem. Juávkku västid jieijâs rekvisiitâst.

Lávdástem kukkodâh enâmustáá 10 min.

Láávdástmist uážžu kevttiđ jienâmaailm ohtân pehtilittee niävvun. Tiätuvuárhá kalga toimâttiđ uárnejeijeid muuneeld. Tiätuvuárkkáhäämi mp4. Lávdástem váldutiäddu kalga leđe oovdânpyehtee taiđust.

NAAMAR

Naamareh lohtâseh teatterân, tot čiähá tâi puáhtá uáinusân. Räähti naamar já keevti mielâkuvviittâs. Vyehi lii rijjâ hervâttem, máálám, hammim já amnâs uásild. Juáháš finnee taiđâr rijjâvuođâ naamar rähtimân. Lijmii naamar tuáhá pááppár tâi máálárteeipi, moos lii čallum tuu jieijâd nommâ já meid škoovlâ nommâ.

Naamarijn toimâttuvvoo uárnejeijeid kove muuneeld. Naamareh puáhtojeh tábáhtusân uáinusân.

ČUOVÂKUVVIM

Čuovâkove puáhtá ravkkâđ muštoid já tobdoid sehe vuorkkiđ aašijd, moh tábáhtuveh mii pirrâ. Tot puáhtá toppiđ vuárkán tehálii puudâ, mučis tâi faste-uv detalji tâi muštâliđ oles mainâs. Čuovâkove lii meid visuaallâš vyehi vaiguttiđ. Uásálistee väldim kove kalga čäittiđ tagarin, ko tot lii valdum -hammiihánnáá.

Ahejuávhuh já teemah:

6-9-ihásiih: ”Keejâ já kaavnâ”
Válduäšši lii kuvvim ilo. Keejâ já kaavnâ maidnii olssis tehálii já vääldi tast kove. Adde kován noomâ.

10-12-ihásiih: ”Maid iärráseh iä hoksáá”

Vääldi kove taggaar ääšist, maid tun uáináh tâi tuubdah já maid iäráseh iä kenski hoksáá? Adde kován noomâ.

13-19-ihásiih: ”Muštâl kove vievâst jieijâd uáinu”

Čuovâkove ij taarbâš dokumentistiđ tuođâlâšvuođâ tagarin, peic kove puáhtá leđe meid taaiđâlâš olgospyehtim. Meid lavastem, jieškove, ovtâskâs detalji já abstrakt kove láá lováliih. Räähti kuulmâ kove rááiđu, numerist kuuvijd já adde rááiđun noomâ.

Čuovâkuuvijd kalga toimâttiđ majemustáá majebaargâ 6.4.2027 uárnejeijeid čujottâsân tarja.porsanger(at)samediggi.fi. Avžuuttum tiätuvuárkkáhäämi .jpg, .jpeg teikâ .tiff. Tábáhtus uárnejeijee printtee kuuvijd já tooimât taid tábáhtusân čáitáldâhhäämist. Jis kovvejeijeeh halijdeh, sij finnejeh printtejum kuuvijd olssis tábáhtus maŋa.

Sämitige stivrâ västid tábáhtus linjiimijn já Sämitige kuávdááh tábáhtus pyevtittâspargoin. Stivrâ lii meridâm, ete tábáhtus viättoo puátteevuođâst kiiđâ loopâbeln já tábáhtus teemah meriduvvojeh jyehi ive. Kiđđuv 2028 tábáhtus puátá Vuáčun já kiiđâ 2029 tábáhtuspäikkikodden tuáimá Aanaar, eidusâš tábáhtuspäikki meriduvvoo maŋeláá.

”Tehálâš uási tábáhtusâst lii čokkâniđ kuhes maađhij keččin já uápásmuđ já teivâđ nuubijd siämmáá ahasijd párnáid já nuorâid. Keevâtlávt säminuorâi taaiđâtábáhtus tuárju sämmilii kulttuuršoddâdem.” Saavâjođetteijee Pirita Näkkäläjärvi tiäddut.

Säminuorâi taaiđâtábáhtus uárnejuvvoo jyehi ive sämmilij päikkikuávlu kieldâin. Tábáhtus fáálá säminuoráid movtijdittee kulttuuraareen, mast jieijâs tááiđuid puáhtá oovdânpyehtiđ já jyehiđ sämmilii aalmugân já nubbijd säminuoráid. Tábáhtus oovded já naanood sämikielâi kevttim já sajattuv párnái já nuorâi kooskâ.

Lasetiäđuh:

Pirita Näkkäläjärvi
Saavâjođetteijee
044 753 3766
pirita.näkkäläjärvi@samediggi.fi

Pyevtittâstiimi:

Minna Lehtola 
044 902 9295
minna.lehtola@samediggi.fi

Petra Biret Magga-Vars
040 732 5503
petra.magga@samediggi.fi

Tarja Porsanger
050 569 6065
tarja.porsanger@samediggi.fi


Jyevi siijđo ovdâskulij

Eres uđđâseh