Sámenuoraid dáiddadáhpáhus lágiduvvo Heahtá skuvllas giđđat 2027

Sámenuoraid dáiddadáhpáhus lágiduvvo Heahtá skuvllas Eanodagas ovttasbarggus Eanodaga gielddain duorastaga 29.04.2027. Eanodaga gielda deavdá boahtte jagi 150 jagi ja Sámenuoraid dáiddadáhpáhusas lea gudni leat mielde dan ávvujagi dáhpáhuskaleandaris. Dáhpáhus movttiidahttá mánáid ja nuoraid beroštit iešguđet dáiddasurggiin ja ovddidit iežaset dáidduid.

Saamelaisnuorten taidetapahtuma
Govva: Sámediggi / Johanna Alatorvinen

Dáhpáhusa dáiddašlájat boahtte jagi dáiddadáhpáhusas leat teáhter,  hápma ja govven. Nuorat ožžot vejolašvuođa čájehit iežaset dáidduid lávdeovdanbuktimiin ja ovdanbuktit čájáhusas govaid, maid sii leat govven. Dieđiheapmi dáhpáhussii rahpasa jagi 2027 álggus.

Dáiddadáhpáhusa temát 2027

Teáhter ja hápma leat buot joavkkuide oktasaš temát. Govven lea juhkkojuvvon golmma sierra ahkejovkui ja temái.

TEÁHTER

Oassálastit dahket ovdanbuktima, mas sáhttá leat vuođđun sápmelaš muitalus, báikkálaš ášši, klassihkalaš máinnas dahje ollásit ođđa giehtačálus. Teáhtera šládjan sáhttá leat ovdamearkka dihte komediija, gelddolašbihttá, drámá, monologa, improvisašuvdna, pantomima, dánsateáhter dahje muhtun eará teáhtera ovdanbuktinvuohki. Ovdanbukti joavku vástida ieš ovdanbuktima biktasiin ja lávddi huksemis ovdal ovdanbuktima. Joavku vástida ieš iežas lávdedávviriin.

Ovdanbuktima guhkkodat eanemustá 10 min.

Ovdanbuktimis oažžu geavahit jietnamáilmmi dan oktan effeaktan. Fiilla galgá doaimmahit lágideaddjiide ovddalgihtii. Fiilahápmi galgá leat mp4. Ovdanbuktima váldodeaddu galgá leat ovdanbukti dáidagis.

HÁPMA

Hámat laktásit teáhterii, dat čiehká dahje buktá oidnosii. Daga háma ja geavat miellagovahusat. Oaččut ieš válljet teknihka hervema, málema, hábmema ja materiálaid oasil. Juohkehaš oažžu dáiddára friijavuođa háma ráhkadeapmái. Liibme báhpára dahje málárteaippa háma duohkái, mas leat du ja skuvlla namat.

Hámain doaimmahuvvo ovddalgihtii lágideaddjiide govva. Hámat buktojit dáhpáhussii oaidninláhkai.

GOVVEN

Govva sáhttá boktit muittuid ja dovdduid ja vurket min birrasis dáhpáhuvvan áššiid. Dat sáhttá vurket dehálaš bottu, čáppa detálja dahje muitalit olles muitalusa. Govva lea maiddái visuálalaš vuohki váikkuhit. Gova, man oassálasti lea govven, galgá ovdanbuktit nu, mo dat lea govvejuvvon almmá rievdadeami haga.

 

Ahkejoavkkut ja temát:

6-9-jahkásaččat: “Geahča ja gávnna”
Deháleamos lea illu govvet. Geahča ja gávnna juoidá mii lea alccet dehálaš ja govve dan. Atte govvii nama.

10-12-jahkásaččat: ”Maid earát eai fuomáš”

Govve dakkár ášši man oainnat dahje gulat ja man earát eai kánske fuomáš? Atte govvii nama.

13-19-jahkásaččat: ”Muital govain iežat oaidninčiega”

Govva ii dárbbaš dokumenteret duođalašvuođa dakkárin, muhto govva sáhttá leat maiddái dáiddalaš ovdanbuktin. Maiddái ieš ordnejuvvon govva (lavastaminen), iešgovva, detállja ja abstrákta govva leat lobálaččat. Daga golmma gova ráiddu, nummarastte govaid ja atte ráidui nama.

Govaid galgá doaimmahit maŋŋebárgga 6.4.2027 rádjai lágideaddjiide čujuhussii tarja.porsanger(at)samediggi.fi. Ávžžuhuvvon fiilahápmi lea .jpg, .jpeg dahje .tiff. Dáhpáhusa lágideaddji prente govaid ja doaimmaha daid čájáhushápmái dáhpáhussii. Govvejeaddjit ožžot prentejuvvon govaid dáhpáhusa maŋŋá alcces jos háliidit.

Sámedikki stivra vástida dáhpáhusa linnjemiin ja Sámedikki guovddážat dáhpáhusa buvttadusbargguin. Stivra lea mearridan, ahte dáhpáhus dollojuvvo loahppagiđa ja dáhpáhusa temát mearriduvvojit juohke jagi. Giđđat 2028 dáhpáhus boahtá Vuhččui ja giđa 2029 dáhpáhusgielda lea Anár, aitosaš dáhpáhusbáiki mearriduvvo maŋŋelabbos.

”Dehálaš oassi dán dáhpáhusas lea čoahkkanit oktii guhkes mátkkiid duohken ja oahpásmuvvat eará seammaahkásaš mánáiguin ja nuoraiguin. Geavatlaččat sámenuoraid dáiddadáhpáhus doarju sámi kulturbajásgeassima.” Ságajođiheaddji Pirita Näkkäläjärvi deattuha.

Sámenuoraid dáiddadáhpáhus lágiduvvo juohke jagi sámiid ruovttuguovllu gielddain. Dat fállá sámenuoraide movttiidahtti kulturarena, gos iežas dáidduid sáhttá čájehit ja juohkit sámegielat gehččiide ja eará sámenuoraide. Dáhpáhus ovddida ja nanne sámegielaid geavahusa ja sajádaga mánáid ja nuoraid gaskkas.

Lassidieđut:

Pirita Näkkäläjärvi
Ságajođiheaddji
044 753 3766
pirita.näkkäläjärvi@samediggi.fi

Buvttadanjoavku

Minna Lehtola 
044 902 9295
minna.lehtola@samediggi.fi

Petra Biret Magga-Vars
040 732 5503
petra.magga@samediggi.fi

Tarja Porsanger
050 569 6065
tarja.porsanger@samediggi.fi


Juoge siiddu ovddosguvlui

Eará ođđasat