Sääʹmnuõri čeäppõspeeiʹv jäʹrjstet Hetta škooulâst ǩeâđđa 2027
Sääʹmnuõri čeäppõspeeiʹv jäʹrjstet Hetta škooulâst Jeänõõǥǥâst õhttsažtuâjast Jeänõõǥǥ kooʹddin nelljdpeeiʹv 29.04.2027. Jeänõõǥǥ kåʹdd teâudd pueʹtti eeʹjj 150 eeʹǩǩed da Sääʹmnuõri čeäppõspeeiʹvest lij cistt leeʹd sij juʹhlleeʹjj šõddmõškalenteeʹr vueʹssen. Čeäppõspeiʹvv älšsmâtt päärnaid da nuõrid čeäppõõzz jeeʹres suõʹrji staarjummša di õõuʹdeed jiiʹjjes tääidaid.
Peeiʹv čeäppõs-šlaaj puõʹtti eeʹjj čeäppõspeeiʹvest lie teatter, maskk da sniimmʼmõš. Nuõr vuäǯǯa vueiʹttemvuõđ čuäʹjted tääideez čuäʹjtemkriiʹlc âʹlnn da čuäʹjted sniimmʼmes sniimid čuäjtõõzzâst. Iʹlmmtõõttmõš čeäppõspeivva ävvan alggeeʹjj 2027.
Čeäppõspeeiʹv teeʹm eeʹjj 2027
Teeʹm teatter da maskk lie pukid ââʹǩǩjooukid õhttsa. Sniimmʼmõš lij juõkkum koolm jeeʹres ââʹǩǩjouʹǩǩe da temma.
TEATTER
Vuässõõđi räʹjje čuäjtõõzz, kååʹtt vuäitt vuâđđõõvvâd sääʹm mainnsa, pääiklaž mainnsa, klaasslaž mainnsa leʹbe samai ođđ ǩiõttǩeeʹrjtõʹsse. Teatteeʹr šlaajjân vuäitt leeʹd õuddmiârkkân komedia, jâddõs, draama, monoloog, improvisaatio, pantomiim, tanssteatter leʹbe kååʹtt-ne jeeʹres teatteeʹr õlmmeemnääʹll. Jiiʹjjes čuäjtõõzz piiutstummšest da kriiʹlc raajjmõõžžâst vaʹsttad čuäʹjteei joukk jiõčč õuʹddel čuäjtõõzz. Joukk lij vaʹstteemvuõđâst jiiʹjjes rekvisiittâst.
Čuäjtõõzz pešttmõš jäänmõsân 10 min.
Čuäjtõõzzâst vuäǯǯ ââʹnned jiõnnmaaiʹlm čuäjtõõzz õhttân viõuseemnääʹllen. Teâttõs âlgg tååimted jäʹrjsteeʹjid õuddǩiõʹtte. Teâttõshäämm mp4. Čuäjtõõzz teädd âlgg leeʹd čuäjtõslaaǥǥan čeäppõõzzâst.
MASKK
Maask koʹlle teatteera, tõk peiʹtte leʹbe päljste. Raaj maask tuu miõllkoovtõõzz ââʹneeʹl. Teknikk lij ääv heäʹrvtem, kälkkeem, häämeem da materiaal peäʹlnn. Maask raajjâmnääʹll lij juõʹǩǩka čeäppõsneeʹǩǩ jiiʹjjes vääʹldest. Liʹjmme põʹmmai leʹbe kälkkarteeiʹp maask tuâkka, koozz lij ǩeeʹrjtum jiijjad da škooul nõmm.
Maaskin tååimtet sniim jäʹrjsteeja õuddǩiõʹtte. Maaskid puuʹtet čeäppõspeivva čuäʹjtemnalla.
SNIIMMʼMÕŠ
Sniimm vuäitt puʹhtted mooštaid da tobddmid di ruõkkâd mij pirr šõddi aaʹššid Tõt vuäitt roʹttjed kaallšõs poodd, moʹččes leʹbe rååʹđ še detaalj leʹbe mušttled mainnâz obbnes. Sniimm lij še visuaalʼlaž kuånstt vaaikted. Vuässõõtti sniimmâm sniimm âlgg čuäʹjted nuʹt, mâʹte tõt lij snimmum – muʹttemtaa.
Ââʹǩǩjoouk da teeʹm:
6-9-âkksa: “ǨIÕČČ da kaaun”
Pââimõs äʹššen lij sniimmâm rämm. Ǩiõčč da kaaun mâiʹd-ne jiõccsad kaallâš da sniim tõn. Uuʹd nõõm sniʹmme.
10-12-âkksa: ”Mâiʹd jeärraz jie vuâmmaž”
Sniim nåkam mâiʹd vuäinak leʹbe toobdak mõõn jeärraz jie možât vuâmmaž? Uuʹd nõõm sniʹmme.
13-19-âkksa: “Čuäʹjet sniimin jiijjad ǩiõččâmvueʹjj”
Sniim ij taarbâž dokumentâʹstted tuõttvuõđ tââʹđstes, peʹce tõt vuäitt leeʹd še čeäppõõzzlaž õlmmõs. Kuliiss raajjmõš, jiõččsniim, detaalj da abstraktt sniim lie še primmum. Raaj koolm sniim rääid, nââmrââʹst sniimid da uuʹd raiddu nõõm.
Sniim âʹlǧǧe tååimted mââibaarǥ 6.4.2027 mõõneeʹst jäʹrjsteeʹjid addrõʹsse tarja.porsanger(at)samediggi.fi. Siâzztõllum teâttõshäämm .jpg, .jpeg tai .tiff. Šõddmõšjäʹrjsteei priʹnttai sniimid da tååimat tõid čuäjtõsmaʹlle čeäppõspeivva. Printtsniimid sniimmi vuäǯǯa haaʹleeʹmes mieʹldd jiõccses čeäppõspeeiʹv mâŋŋa.
Sääʹmteeʹǧǧ halltõs vaʹsttad čeäʹppvuõttpeeiʹv linjjummšin da Sääʹmteeʹǧǧ kõõskõõzz čeäʹppvuõttpeeiʹv puuʹtʼtem tuâjain. Halltõs lij tuʹmmääm, što čeäʹppvuõttpeeiʹvid vieʹttjet juätkast loppǩiiđ di čeäʹppvuõttpeeiʹvi teeʹmid mieʹrreet eeǥǥlânji. Ǩeâđđa 2028 čeäʹppvuõttpeiʹvv puätt Vuõčču da ǩiiđ 2029 Čeäʹppvuõttpeiʹvv lij Aanrest, jiõčč šõddmõšpääiʹǩ mieʹrreet mâʹŋŋlubust.
“Tääʹrǩes vueʹssen lij noorõõttâd õʹhtte kuʹǩes kõõski tueʹǩǩen da tobdstõõttâd da vueiʹnned jeärrsid seämma âkksaž päärnaid da nuõrid. Sääʹmnuõri čeäppõspeeiʹv tuärjjee tuejjeem tääʹzzest sääʹm kulttuurškoouʹlʼjummuž.” Saaǥǥjååʹđteei Pirita Näkkäläjärvi särnn.
Sääʹmnuõri čeäppõspeeiʹv jäʹrjstet eeǥǥlânji säʹmmlai dommvuuʹd kooʹddin. Šõddmõš taʹrjjad sääʹmnuõrid älšsmõʹtti kulttuurareena, koʹst jiiʹjjes tääidaid vuäitt čuäʹjted da jueʹǩǩed sääʹm ǩiõččjid da nuuʹbbid sääʹmnuõrid. Šõddmõš õõuʹdad da raavad sääʹmǩiõli âânnmõõžž da sââʹj päärnai da nuõri kõõskâst.
Lââʹssteâđaid oudd:
Pirita Näkkäläjärvi
Saaǥǥjååʹđteei
044 753 3766
pirita.näkkäläjärvi@samediggi.fi
Puuʹtʼteeitiim:
Minna Lehtola
044 902 9295
minna.lehtola@samediggi.fi
Petra Biret Magga-Vars
040 732 5503
petra.magga@samediggi.fi
Tarja Porsanger
050 569 6065
tarja.porsanger@samediggi.fi