Sämitigge tuáivut pyere Säämi Pride!
Säämi Pride tuálloo taan ive Anarist 8.8. Tábáhtus uárnejeh oovtâstpargoost Aanaar Pride já Suomâ Säminuorah (SSN).
Säämi Pride Ucjuuvâst ive 2021. Kove: Ville Fofonoff / Sämitigge
Säämi Pride uárnejuvvoo jyehi ive sierâ kuávlust Säämi. Tábáhtus álgá Pride-ráiđuväzzimáin, mon maŋa fáállun lii maaŋgâpiälásâš ohjelm.
Sämitigge paajeed stáágun Aanaar Pride kunnen Sajosist sehe Säämi já Suomâ liipu já meid sämmilii Pride-liipu. Sämitige Jeessân Janne Hirvasvuopio oovdâst Sämitige tábáhtusâst.
– Säämi Pride čuákkee arvetävgisiärváduv oohtân já puáhtá mii uáinusân. Jyehi arvetävgisiärváduv jesânist kalga leđe máhđulâšvuotâ eelliđ Säämist tágárin tego sun jieš lii já tubdâđ jieijâs tile torvolâžžân, Hirvasvuopio iätá.
Oovtviärdásâšvuotâ lii tehálâš árvu Sämitiggeest
Sämitiigán lii tehálâš, ete juáháš puáhtá leđe tággáár ko jieš lii já uásálistiđ siärváduv tooimâid ovtviärdásâžžân. Taan pargo toorjân Sämitigge lii meridâm rähtiđ arvetävgipoolitlii ohjelm ive 2026 ääigi. Ohjelm ulmen lii ovdediđ sämmilij seksuaal- já suhâpeliucceeblovoi pyereestvaijeem já ovtviärdásâš kohtâlem.
– Säämi Pride lii tehálâš muštottâs tast, ete olmoošvuoigâdvuođah, oovtviärdásâšvuotâ já torvolâš siärvádâh kuleh puohháid. Sämitigge haalijd jieijâs tooimâin ovdediđ sämisiärváduv, mast juáháš uážžu tubdâđ, ete sun lii tuhhiittum tego sun lii, iätá Sämitige I värisaavâjođetteijee Leo Aikio.
Sämitigge tuáivut puohháid pyere já torvolii Säämi Pride, mast láá ennuv ilo já teivâdmeh!
Lasetiäđuh Säämi Pride sosiaallii media kanavain: Facebook já Instagram
Lasetiäđuh:
Leo Aikio
I värisaavâjođetteijee
040 621 6505
leo.aikio@samediggi.fi
