Sámediggi sávvá buori Sápmi Pride!
Sápmi Pride ávvuduvvo dán jagi Anáris 8.8.2026. Dáhpáhusa ordnejit ovttasráđiid Anár Pride ja Suoma Sámi Nuorat.
Sápmi Pride Ohcejogas jagi 2021 Govva: Ville Fofonoff / Sámediggi
Sápmi Pride ordnejuvvo jahkásaččat iešguđet guovllus Sámis. Dáhpáhus álgá Pride-ráidovázzimiin ja dan maŋŋá lea máŋggabealat prográmma.
Sámediggi levge Anár Pride gudnin Sajosis sihke Sámi ja Suoma leavggaiguin, ja maiddái sámi Pride-leavggain. Sámedikki dáhpáhusas ovddasta Sámedikki lahttu Janne Hirvasvuopio.
– Sápmi Pride čohkke arvedávgeservoša oktii ja buktá min oidnosii. Juohkehaš, guhte gullá arvedávgeservošii, galgá beassat eallit Sámis dakkárin go son ieš lea ja dovdat iežas dili oadjebassan, Hirvasvuopio dadjá.
Ovttaveardásašvuohta lea dehálaš árvu Sámedikkis
Sámediggái lea dehálaš, ahte juohkehaš sáhttá leat dakkár go ieš lea ja searvat servoša doibmii ovttaveardásažžan. Dán barggu doarjjan Sámediggi lea mearridan arvedávgepolitihkalaš prográmma ráhkadeami jagi 2026 áigge. Prográmma ulbmilin lea ovddidit sápmelaš seksuála- ja sohkabeallevehádagaid buresveadjima ja ovttaveardásaš meannudeami.
– Sápmi Pride lea dehálaš muittuhus das, ahte olmmošvuoigatvuođat, ovttaveardásašvuohta ja dorvvolaš searvvuš gullet buohkaide. Sámediggi hálida iežas doaimmain ovddidit sámeservoša, mas juohkehaš sáhttá dovdat ahte lea dohkkehuvvon dakkárin go ieš lea, dadjá Sámedikki I várreságajođiheaddji Leo Aikio.
Sámediggi sávvá buohkaide buori ja dorvvolaš Sápmi Pride, mas lea ollu illu ja deaivvadeamit!
Lassidieđut Sápmi Pride sosiála media kanálain: Facebook ja Instagram
Lassidieđut:
Leo Aikio
I varapuheenjohtaja
040 621 6505
leo.aikio@samediggi.fi
