Sämitigge uásálistij vuáđuškoovlâ visioraapoort almostittemtilálâšvuotân Helsigist kuovâmáánu 11. peeivi
Vuáđuškovlâ 2045: Eellim várás -visio adelui máttááttâsminister Anders Adlercreutzân Helsigist 11.2.2026. Sämitige tilálâšvuođâst ovdâstij Maarit Kiprianoff. Visio mield vuáđuškoovlâ pargon lii lasettiđ mättim já táátu kevttiđ tiäđu ohtsii pyere oovdedmân.
Sämitiggeest tilálâšvuotân uásálistijn škovlim- já oppâmateriaallävdikode värijeessân Maarit Kiprianoff já škovlimčällee Bigga-Helena Magga.
Visio kuávdášlâš juurdâ lii, ete noonâ vuáđutiäđuh já -tááiđuh ovtâstuveh eettisáid, sosiaalláid já njyebžilis jurdâččem táiđoid sehe nahcân stivriđ jieijâs oppâm. Teknologia ain jotelub ovdánem, ekologâlâš kriisâ já ohtsâškodálâš sierânem hästih škovlim vuáđupargo. Škoovlâ roolin ij lah tuš valmâštiđ nuorâid puátteevuođâ nubástussáid, peic valmâštiđ eellim várás já adeliđ naavcâid nubásmittiđ maailm.
Sämikielah já -kulttuur láá uási loppâraportist já raportist pahuduvvoo: ”Sämikielah já -kulttuur láá merhâšittee uási aalmuglii maaŋgânálásâšvuođâst já riges kulttuurlii historjást já taan ääigist. Sämikielâi uásild tiäduttuvvoo puátteevuođâst ovdiist eenâb tot, ete ain stuárráb eenâbloho sämipárnáin ääsih sämmilij päikkikuávlu ulguubeln. Sämikielâi eellimvuáimálâšvuođâ turvim váátá meritiätulijd čuávdusijd, moh vääldih vuotân nubásmuvvee tiilijd já uáppei táárbuid.”
Ráđádâllâmkode saavâjođetteijee addel raapoort máttááttâsministerân. Kove: OKM / Elviira Säkkinen
Vuáđuškoovlâ puátteevuotâpargo sajadui ivvijd 2023–2025. Sämitige ovdâsteijen ráđádâllâmkoddeest lâi škovlimčällee Bigga-Helena Magga. Ráđádâllâmkode lasseen paargon uásálistii tuhátteh ulmuuh, kiäh lijjii mieldi ideistmist, kommentistmist já huksiimin visioid sierâlágán kulâmij peht.
Visiopargo kyeddee juurdân láá lamaš vuáđuškoovlâ kievrâvuođah:
- puohháid ohtsâš nuuvtá já almosruttâdum vuáđuškovlâ,
- rehtor já máttáátteijeeh, kiäh västideh škoovlâ tooimâst,
- tutkâmušân vuáđuduvvee máttáátteijeeškovlim já škoovlâ ovdedem, sehe
- máttáátteijee autonomia já pedagogisâš rijjâvuotâ.
Visio tiäddut ive 2045 vuáđuškoovlâst táiđu- já taaiđâamnâsijd, lihâdem já rumâšlâšvuođâ, škoovlâ maaŋgâpiälálii tooimâ, mii ana sistees máttááttâs já šoddâdem lasseen ovdâmerkkân škovlâpurâdem, uáppeehuolâttâs já eres tooimâid, moh ovdedeh täsiáárvu, sehe aldaškoovlâ já škovlârakânâs, mast puáhtá teivâđ nubijguin njunáluvâi sehe škoovlâ, mii tuárju olmožin šoddâm.
Lasetiäđuh:
Bigga-Helena Magga
Škovlimčällee
040 570 2786 / 010 839 3121
bigga-helena.magga@samediggi.fi
