Sämitigge juhlo uđâsmittum sämitiggelaavâ sämmilij aalmugpeeivi Anarist

Sämitigge puávdee puohâid, kiäh láá perustum, uásálistiđ tilálâšvuotân pääihi alne teikkâ káidusin. Tilálâšvuotân uásálistem pääihi alne váátá almottâttâm muuneeld. Almottâttâm luhostuvá taan liiŋkâ peht já almottâttâmäigi lii 23.1.2026 räi. Tilálâšvuotân uárnejuvvoo meid sáttu Hettaast, Čevetjäävrist, Ucjuuvâst, Avelist já Vuáčust. Tun puávtáh almottâttâđ meid sáátun liiŋkâ peht. Vääldi huámmášumán, ete sajeh láá räijejum meeri, te almottât nuuvt jotelávt ko máhđulâš vâi visásmitáh jieijâd saje. 

– Uđđâ valjâpaje juhlom lii ain merhâšittee muddo, já taan tove mij juhlop meid historjálii juvso. Uđđâ sämitiggelaahâ lii meritiätulii pargo puáđus, mii naanood sämmilii jiešhaldâšem já puáttee suhâpuolvâi vuoigâdvuođâid, iätá Sämitige I värisaavâjođetteijee Leo Aikio. 

Juhlepeeivi ääigi mij vuáijup uđâsmittum sämitiggelaavâ merhâšumán já valjâpaje ulmijd. Peeivi ääigi mij kuullâp sahâvuáruid já muusik pirrâ Säämi. Juuhlán pääihi oolâ láá puávdejum sämisiärváduv jesâneh já ohtsâškode vaikutteijeeh, Suomâ staatâ já sierâlágán oovtâstpargopeelij ovdâsteijeeh sehe Taažâ já Ruotâ Sämitiigij presidenteh.  

– Taan juhle peht mij halijdep čäittiđ kijttosijd puoh sijjân, kiäh láá iivij mield porgâm uđđâ sämitiggelaavâ oovdân. Siämmást mij keččâp meid puátteevuotân, taan valjâpajan já ovdâsvástádâsân, maid mij kyeddip sämmilij ovdâsteijen, iätá I värisaavâjođetteijee Leo Aikio.  

Maŋeláá siämmáá peeivi ohjelmist lii Ulla Pirttijärvi já Ulda -juávhu konsert Säämi kulttuurkuávdáš Sajosist. Konsert lii puohháid ávus já nuuvtá. 

Juhle täärhib ohjelm almostittoo Sämitige nettisijđoin čujottâsâst www.samediggi.fi 

Juhle puáhtá čuávvuđ njuolgâ vuolgâttâssân čujottâsâst www.sajos.fi/live.  

Lasetiäđuh tábáhtusâst já almottâtmeh: 

Saara-Maria Salonen
saara-maria.salonen@samediggi.fi
044 739 4007