Sämitigge uásálistij staatâpeeivij 2026 lekkâmtuáloid – Täsivääldi president pajedij savâstis oovdân sämmilijd
Sämitige stiivrâ jeessân Inka Musta uásálistij onne kuovâmáánu 4. peeivi staatâpeeivij lekkâmtuáloid, moh uárnejuvvojii Helsig tuámukirhoost já Ovdâskoddetáálust.
Kove: Sämitige jeessân Inka Musta staatâpeeivij lekkâmtuáluin. Markku Ulander/ Lehtikuva.
Täsivääldi president Alexander Stubb čujottij lekkâmsavâstis sämmilijd já puovtij oovdân sämmilijd kyeskee teemaid. Savâstis sun eeđâi návt:
“Ohtâ tehálâš miärádâs lâi sämitiggelaavâ uđâsmittem. Sämmiliih láá Suomâ áinoo algâaalmug. Tot, maht mij lattip sii kuáttá, muštâl maggaar ohtsâškodde já demokratia mij lep.
Sämmilij tuotâvuotâ- já sovâdâttâmkomissio almostitij jieijâs raapoort juovlâmáánust. Mun avžuuttâm väldiđ komissio pargo vuástá tuođâlávt – já juátkiđ sovâdâttâm, koskânis kunnijâttem já oovtâstpargo pálgást.”
– Mij anneep áárvust tom, ete täsivääldi president pajedij sämmilijd oovdân staatâpeeivij lekkâmsaavâst, mon sun toolâi ovdâskoodán. Sämmilij vuotân väldim syemmilii ohtsâškode uássin já ton miärádâstoohâm váimusist lii tehálâš viestâ sehe sämisiärvádâhân já mii miärádâstahheid. Mij kijttep president taan tavvoost já jieččân uásild halijdep ovdediđ pyeritátulii vuárusavâstâllâm ovdâskode, staatâ já sämmilij kooskâ, iätá Sämitige stiivrâ jeessân Inka Musta.
Täsivääldi president tiervâttij lekkâmtuáluin ovdâskode já kulluuttij staatâpeeivijd lekkum. Täsivääldi president oles saavâ puáhtá luuhâđ taa.
Sämitige stivrâ já virgeulmuuh teivâdii täsivääldi president moonnâm ohhoost 29.1. Presidentlanneest Helsigist. Koččâmušâst lâi kuálmád teivâdem president Stubb paajeest.
Lasetiäđuh:
Inka Musta
Sämitige stiivrâ jeessân
040 634 9900
Johanna Alatorvinen
Viestâdemčällee
040 663 4493
johanna.alatorvinen(at)samediggi.fi
