Sämitigge ocá hahâvuávájeijee Sámi Handicraft Academy 2027 -haahân

Sámi Handicraft Academy 2027 -haavâ váldu-ulmen lii vuáháduttiđ, paijeentoollâđ já ovdediđ sämmilij kietâtyejitááiđuid já -mättim sämisiärvusist. Haahâ uárnee pargopáájáid já seminaarijd ärbivuáválii tiäđu jyehimân suhâpuolvâi kooskâst eromâšávt Iänuduvâst, Kuovdâkiäinust Taažâst sehe Ruotâbeln Käresavonist. Taah pargopáájáh já seminaareh fäälih tuáijáráid, servijd já organisaatioid máhđulâšvuođâid hárjuttiđ kietâtyejitááiđuid, lonottiđ jurduid já savâstâllâđ sämmilii kietâtyeje puátteevuođâst. Haavâ ulmen lii meid pyerediđ sämmilij kietâtyejitááiđui finnimvuođâ digitaallij pargoniävui já viermioppâm vievâst.

Haavâst nanoduvvoo sämityeji kannattetten já kilelin ekonomâlâžžân iäláttâssân pyereedmáin tuáijárij finnodâhtoimâmättim, markkânistemstrategiaid já peessâm markkânáid. Haavâst meid torvejuvvoo sämmilij ärbivuáválâš tiätu rähtimáin vuáváámijd eettisij ravvui rähtim várás kunnijâtmáin kulttuuräärbi já estimáin puástukevttim. Haahâ lii Suomâ já Taažâ sämitiigij ohtsâšhaahâ, mast Suomâ Sämitigge västid haavâ haldâttuvâst, ekonomiast já raportistmist.

Hahâvuávájeijee pargon lii pieijâđ joton Sámi Handicraft Academy 2027 -haavâ vuávám mield, olášuttiđ vuávájum tooimâid, huolâttiđ raportistmist, čuávvuđ proojeekt ekonomia olášume sehe huolâttiđ haavâ haldâttuvâst aalgâst loopâ räi.  Pargo váátá aktiivlii vuáruvaikuttâs já viijđes oovtâstpargo čonâsjuávkkukiedist sehe naavcâ haldâšiđ nubástusâid.

Palvâluskoskâvuođâ tiäđuh

Pargo álgáččij sopâmuš mield porgemáánust 2025 já pištá ive 2027 loopâ räi. Pargo lii Sämitige almos toimâttuv vuálásâš.

Sämitige toimâpäikki lii Säämi kulttuurkuávdáš Sajosist, Anarist, mutâ pargo lii máhđulâš porgâđ káiduspargon.

Occest mij vyerdip

Tohálâšvuođâiähtun lii pargo vaattâm hiäivulâš škovlim já sämikielâ táiđu (asâttâs 1727/95). Mij vyerdip hárjánem proojeekthaaldâšmist, naavcâid haldâšiđ proojeektporgâm vuáváámist kidâ operatiivlii olášutmân, šiev oovtâstpargo- já organisistemtááiđuid sehe čielgâ kirjálii viestâdemtááiđu. Pargo miänástuvvee hoittám váátá šiev ärbivuáválii sämmilii kietâtyeje, sämikulttuur já iäláttâsâi tubdâm sehe naavcâid aalmugijkoskâsii oovtâstpaargon sämikuávlust.

Pälkki

Pälkki miärášuvá Sämitige pälkkivuáháduv vátávâšvuotâtääsi IV/III mield (vuáđupälkki olespargoääigi 2931,34 eurod/mp). Vuáđupäälhi lasseen máksojeh 24 % sämikuávlu lase sämikuávlust porgâdijn já pargohárjánem mield miärášuvvee hárjánemlaseh.

Uuccâm

Uuccâmluámáttuv, rijjâhámásii uuccâmreeivâ sehe máhđulii ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 5.8.2025 räi taan uuccâmluámáttuv peht (lekkâs uđđâ laasân): Uuccâmluámáttâh

Sämitigge lii finnim Sámi Handicraft Academy 2027 -haahân Interreg Aurora ruttâdem.

Lasetiäđuid pargoost addel 14.-25.7.2025 koskâsii ääigi pargoviehâhovdâ Ida Pirttijärvi, ida.pirttijarvi@samediggi.fi, puh. 040 660 77 22

Sämitige tooimân puáhtá uápásmuđ nettičujottâsâst www.samediggi.fi.

Anarist 11.7.2025
Sämitigge