Sämitige tutkâmeettisâš rääđi algâttij tooimâs
Sämitige uđđâ tutkâmeettisâš rääđi naanood sämmilij máhđulâšvuođâid uásálistiđ sämmilijd kyeskee tutkâm eettisii árvuštâlmân. Rääđi pargon lii ovdediđ tutkâmeettisij ravvui olášume, meridiđ sämmilij siärvuslijn munemietâmâšâin já ovdediđ munemietâmâšmonâttâllâm.
Kove: VIlle Fofonoff
Sämitige tutkâmeettisii rääđi toimâ vuáđuduvá Sämitige ive 2016 kiävtun väldim monâttâlmân rijjâ tiätun vuáđuduvvee munemietâmâš tiäđustâlmist. Monâttâllâm ulmen lii turviđ sämmilij algâaalmugvuoigâdvuođâi olášume tutkâmist já haavâin, moh kyeskih tâi pyehtih kuoskâđ sämmilij kulttuuráárbán já ärbivuáválii tiätun. Siämmást monâttâllâm oovded sämmilij kulttuuräärbi siäilum já naanood sämmilij jiešmeridemvuoigâdvuođâ jieijâs kulttuuráárbán já ärbivuáválii tiätun. Kandidaat- já pro gradu -pargoin ij vattuu munemietâmâšmonâttâllâm.
Tutkâmeettisâš rääđi čokkânij vuossâmuu tove 29.9.2026. Čuákkimist piejii joton rääđi pargo, kieđâvuššii sämmilijd kyeskee tutkâm- já ovdedemhavváid lohtâseijee munemietâmâšpivdemijd já valmâštâllii uáivilalmottâs sämmilij tuotâvuotâ- já sovâdâttâmkomissio toimâiävtuttâsân säämi tutkâm toimâkoddeest.
Tutkâmeettisâš rääđi valmâštâl iävtuttâs puáttee munemietâmâšmonâttâlmin
Tolebáá Sämitige äššitobdeelävdikodeh kieđâvuššii jieijâs toimâsuárgán lohtâseijee munemietâmâšpivdemijd. Majemui iivij ääigi munemietâmâšpivdemij meeri lii lasanâm, mii lii lasettâm táárbu ovdediđ toi kieđâvuššâm Sämitiggeest sehe oovtânálásittiđ vuáháduvâid.
Tutkâmeettisâš rääđi tuáimá meriáigásâžžân orgaanin 31.12.2027 räi. Ton ääigi tutkâmeettisii rääđi ohtân pargon lii meid valmâštâllâđ iävtuttâs puáttee monâttâlmin munemietâmâšâi mieđeetmist. Taan pargoost Sämitige tutkâmeettisâš rääđi haalijd porgâđ oovtâstpargo eereeb iärrás sämitutkâmáin já sämiaalmugáin.
Sämitige saavâjođetteijee Pirita Näkkäläjärvi tuáimá tutkâmeettisii rääđi saavâjođetteijen.
– Tutkâmeettisâš rääđi naanood Sämitige tutkâmeettisii äššitubdâm, čielgâsmit munemietâmâšâi kieđâvuššâm já västid jieijâs uásild lasanâm munemietâmâšpivdemij miärán. Návt mij pyehtip ovdiist pyerebeht visásmittiđ, ete sämmilijd kyeskee tutkâm váldá vuotân sämmilij vuoigâdvuođâid, kulttuuräärbi já ärbivuáválii tiäđu, iätá Näkkäläjärvi.
Sämitiggeest lii porgâškuáttám siärvuslii munemietâmâš sierânâsäššitobdee
Tutkâmeettisii rääđi tooimâ tuárju meriáigásâš EU-aašij já siärvuslii munemietâmâš sierânâsäššitobdee. Toimâ vuáđudui vâi Sämitiggeest láá pyerebeh naavcah västidiđ lasanâm munemietâmâšpivdemij miärán já tot meid tuárju rääđi tooimâ. Edda Sundström, kote lii porgâškuáttám porgemáánust, västid munemietâmâšaašij valmâštâlmist tutkâmeettisii rááđán já uásálist Sämitige EU-aašij valmâštâlmân
Sämitige tutkâmeettisâš rääđi
Sämitige tutkâmeettisâš rääđi koordinist já oovded Sämitige munemietâmâšmonâttâllâm sehe Sämmilijd kyeskee tutkâm eettisij ravvui olášuttem já vuotân väldim virgeomâhái já tutkâmlájádâsâi tooimâst já miärádâstohâmist sehe juáhá tiäđu tutkâmeettisij ravvui olášutmist. Lasseen rääđi meerrid Sämitige munemietâmâšâi mieđeetmist tutkâmáid já eres toimáid, moh kyeskih tâi main puáhtá leđe vaikuttâs sämikulttuurân já ärbivuáválii tiätun. Rääđi valmâštâl meid munemietâmâšmonâttâllâm ovdedem.
Tutkâmeettisii rääđi jesâneh já värijesâneh:
Jesâneh
Pirita Näkkäläjärvi, saavâjođetteijee
Tauno Ljetoff, värisaavâjođetteijee
Heidi Eriksen
Inka Musta
Tuula-Maija Magga-Hetta
Värijesâneh
Janne Hirvasvuopio
Tuomas Aslak Juuso
Leena Niittyvuopio-Jämsä
Marjaana Aikio
Nilla Tapiola
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
Edda Sundström
Sierânâsäššitobdee, EU-ääših já siärvuslâš munemietâmâš (FPIC)
044 527 7078
edda.sundstrom@samediggi.fi
