Sámedikki dutkanehtalaš ráđđi álggahii doaimmas

Sámedikki dutkanehtalaš ráđi doaibma vuođđuduvvá dan meannudanvuohkái, man Sámediggi válddii atnui 2016, mainna diđoštuvvo friija dihtui vuođđuduvvi ovdamiehtan. Meannudanvuogi mihttomearrin lea dorvvastit sámiid álgoálbmotvuoigatvuođaid ollašuvvama dutkamis ja prošeavttain, mat gusket dahje sáhttet guoskat sámiid kulturárbái ja árbedihtui. Seammás meannudanvuohki ovddida sámiid kulturárbbi seailuma ja nanne sámiid iešmearridanvuoigatvuođa iežaset kulturárbái ja árbedihtui. Kandidáhta- ja pro gradu -bargguin eai gáibiduvvo ovdamiehtanmeannudeapmi.

Dutkanehtalaš ráđđi čoahkkanii vuosttas háve 29.9.2026. Čoahkkimis álggahuvvui ráđi bargu, gieđahallojedje sámiid guoski dutkan- ja ovddidanprošeavttaid ovdamiehtanbivdagat ja válmmaštallojuvvui bealiváldin sámiid duohtavuohta- ja soabadankomišuvnna doaibmabidjoevttohussii sámi dutkama doaibmagottis.

Dutkanehtalaš ráđđi válmmaštallá evttohusa boahttevaš ovdamiehtanmeannudeapmin

Ovdal dán Sámedikki áššedovdilávdegottit gieđahalle ovdamiehtanbivdagiid, mat laktásedje sin doaibmasurggiide. Maŋimuš jagiid áigge ovdamiehtanbivdagiid mearri lea lassánan, mii lea lasihan dárbbu ovddidit daid gieđahallama Sámedikkis ja maid dárbbu oktilaš geavadiidda.

Dutkanehtalaš ráđđi doaibmá mearreáigásaš doaibmaorgánan 31.12.2027 rádjai. Dan áigge dutkanehtalaš ráđi oktan bargun lea maiddái válmmaštallat evttohusa ovdamiehtama mieđiheami guoski boahttevaš meannudeapmin. Dán barggus Sámedikki dutkanehtalaš ráđđi háliida bargat ovttas earret eará sámedutkamiin ja sámi álbmogiin.

Sámedikki ságajođiheaddji Pirita Näkkäläjärvi doaibmá dutkanehtalaš ráđi ságadoallin.

– Dutkanehtalaš ráđđi nanne Sámedikki dutkanehtalaš áššedovdamuša, čielggasmahttá ovdamiehtamiid gieđahallama ja vástida bealistis lassánan ovdamiehtanbivdagiid mearrái. Ná sáhttit buorebut go ovdal sihkkarastit dan, ahte sámiid guoski dutkan váldá vuhtii sámiid vuoigatvuođaid, kulturárbbi ja árbedieđu, dadjá Näkkäläjärvi.

Sámedikkis lea álggahan searvvušlaš ovdamiehtama erenoamášáššedovdi

Dutkanehtalaš ráđi doaimma doarju mearreáigásaš EU-áššiid ja searvvušlaš ovdamiehtama erenoamášáššedovdi. Bargu vuođđuduvvui nannet Sámedikki gearggusvuođaid vástidit lassánan ovdamiehtamiid mearrái ja doarjut ráđi doaimma. Borgemánus barggus álggahan Edda Sundström vástida ovdamiehtanáššiid válmmaštallamis dutkanehtalaš ráđđái ja oassálastá Sámedikki EU-áššiid válmmaštallamii.

Sámedikki dutkanehtalaš ráđđi

Sámedikki dutkanehtalaš ráđđi koordinere ja ovddida Sámedikki ovdamiehtanmeannudeami ja sámiid guoski dutkama ehtalaš rávvagiid ollašuhttima ja vuhtiiváldima eiseválddiid ja dutkanlágádusaid doaimmas ja mearrádusdahkamis ja maid juohká dieđu dutkanehtalaš rávvagiid heiveheamis. Dasa lassin ráđđi mearrida Sámedikki ovdamiehtamiid mieđiheamis dutkamiidda ja eará doaibmabijuide, mat gusket dahje sáhttet váikkuhit sámekultuvrii ja árbedihtui. Ráđđi válmmaštallá maiddái ovdamiehtanmeannudeami ovddideami.

Dutkanehtalaš ráđi lahtut ja várrelahtut:

Lahtut

Pirita Näkkäläjärvi, ságadoalli
Tauno Ljetoff, várreságadoalli
Heidi Eriksen
Inka Musta
Tuula-Maija Magga-Hetta

Várrelahtut

Janne Hirvasvuopio
Tuomas Aslak Juuso
Leena Niittyvuopio-Jämsä
Marjaana Aikio
Nilla Tapiola

Lassidieđut:

Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi

Edda Sundström
Erenoamášáššedovdi, EU-áššit ja searvvušlaš ovdamiehtan (FPIC)
044 527 7078
edda.sundstrom@samediggi.fi