Sääʹmteeʹǧǧ tuʹtǩǩeemeettlaž suåvtõs alttii tåimmjummšes

Sääʹmteeʹǧǧ tuʹtǩǩeemeettlaž suåvtõõzz tåimmjummuš vuâđđââvv Sääʹmteeʹǧǧ eeʹjjest 2016 ââʹnnma väʹlddem mõõntõõllmõʹšše pååđ tiõttu vuâđđõõvvi ouddmiâsttmõõžž teâđstõõllâm diõtt. Mõõntõõllmõõžž täävtõssân lij tuõrvvâd säʹmmlai alggmeervuõiggâdvuõđi teâuddjummuš tuʹtǩǩummšest da haʹŋǩǩõõzzin, kook kueʹsǩǩe leʹbe vueiʹtte kuõskkâd säʹmmlai kulttuurääʹrb da äʹrbbvuõđlaž teâđaid. Seämma-ääiʹj mõõntõõllmõš oouʹdad säʹmmlai kulttuurääʹrb seillmõõžž da raavad säʹmmlai jiõččmieʹrreemvuõiggâdvuõđ jiijjâz kulttuurärbba da äʹrbbvuõđlaž tiõttu. Kandidatt- da pro gradu -tuâjain jeät õõlǥât ouddmiâsttâm-mõõntõõllmõõžž.

Tuʹtǩǩeemeettlaž suåvtõs noorõõđi vuõssmõs vuâra 29.9.2026. Såbbrest jåʹttʼteš suåvtõõzz tuâjj, ǩiõttʼtõʹlleš säʹmmlaid kuõskki tuʹtǩǩeem- da ooudâsviikkâmhaʹŋǩǩõõzzid õhttneei ouddmiâsttâmraukkmõõžžid di valmštõʹlleš peäʹlestvälddmõõžžid säʹmmlai tuõttvuõtt- da suåvâdvuõttkomissio tåimmeʹtǩǩõʹsse sääʹm tuʹtǩǩummuž tåimmkååʹddest.

Tuʹtǩǩeemeettlaž suåvtõs valmštââll eʹtǩǩõõzz puõʹtti ouddmiâsttâm-mõõntõõllmõššân

Ääiʹjab Sääʹmteeʹǧǧ äʹšštobddiluʹvddkååʹdd ǩiõttʼtõʹlle jiijjâz tåimmsuârggses õhttneei ouddmiâsttâmraukkmõõžžid. Mõõnni iiʹjjin ouddmiâsttâmraukkmõõžži mieʹrr lij šõddâm, mii lij lââʹzztam taarb tõi ǩiõttʼtõõllmõõžž ooudâsviikkmõʹšše Sääʹmteeʹǧǧest di õõutmeâldlaž vuõʹjjid.

Tuʹtǩǩeemeettlaž suåvtõs tåimm mieʹrräiggsaž orgaanân 31.12.2027 räjja. Tõn poodd tuʹtǩǩeemeettlaž suåvtõõzz õhttân tuâjjan lij še valmštõõllâd eʹtǩǩõõzz ouddmiâsttmõõžži miõttmõõžž kuõskkjen puõʹtti mõõntõõllmõššân. Tän tuâjast Sääʹmteeʹǧǧ tuʹtǩǩeemeettlaž suåvtõs haaʹlad tuejjeed õhttsažtuâj jeäʹrbi mieʹldd sääʹmtuʹtǩǩummuž da sääʹm-meerivuiʹm.

Sääʹmteeʹǧǧ saaǥǥjååʹđteeʹjj Pirita Näkkäläjärvi tåimm tuʹtǩǩeemeettlaž suåvtõõzz saaǥǥjååʹđteeʹjen.

– Tuʹtǩǩeemeettlaž suåvtõs raavad Sääʹmteeʹǧǧ tuʹtǩǩeemeettlaž äʹšštobddmõõžž, čiõlǥat ouddmiâsttmõõžži ǩiõttʼtõõllmõõžž da vaʹsttad vuäzzas šõddâm ouddmiâsttâmraukkmõõžži meärra. Nääiʹt vueiʹttep oouʹdab pueʹrben ainsmâʹtted, ǥu säʹmmlaid kuõskki tuʹtǩǩummuš väldd lokku säʹmmlai vuõiggâdvuõđid, kulttuurääʹrb da äʹrbbvuõđlaž teâđ, särnn Näkkäläjärvi.

Sääʹmteeʹǧǧest lij alttääm õhttsallaž ouddmiâsttmõõžž sueʹrǧǧäʹšštobddi

Tuʹtǩǩeemeettlaž suåvtõõzz tåimmjummuž tuäʹrjj mieʹrräiggsaž EU-aaʹšši da õhttsallaž ouddmiâsttmõõžž sueʹrǧǧäʹšštobddi. Tuâjj vuâđđeeš raaveed Sääʹmteeʹǧǧ vaalmâšvuõđid vaʹstteed šõddâm ouddmiâsttâmraukkmõõžži meärra di tueʹrjjeed suåvtõõzz tåimmjummuž. Påʹrǧǧmannust tuâjast alttääm Edda Sundström vaʹsttad ouddmiâsttâmaaʹšši valmštõõllmõõžžâst tuʹtǩǩeemeettlaž suåvtõʹsse da vuässââtt Sääʹmteeʹǧǧ EU-aaʹšši valmštõõllmõʹšše.

Sääʹmteeʹǧǧ tuʹtǩǩeemeettlaž suåvtõs

Sääʹmteeʹǧǧ tuʹtǩǩeemeettlaž suåvtõs koordinâstt da oouʹdad Sääʹmteeʹǧǧ ouddmiâsttâm-mõõntõõllmõõžž di Säʹmmlaid kuõskki tuʹtǩǩummuž eettlaž vuäppõõzzi tiuʹddepiijjmõõžž da lokku välddmõõžž veʹrǧǧniiʹǩǩi da tuʹtǩǩeemstroiʹttli tåimmjummšest da tuʹmmstõktuâjast di juâkk teâđaid tuʹtǩǩeemeettlaž vuäppõõzzi suåvldummšest. Lââʹssen suåvtõs tuʹmmai Sääʹmteeʹǧǧ ouddmiâsttmõõžži miõttmõõžžâst tuʹtǩǩummšid da jeeʹres tååimaid, kook kueʹsǩǩe leʹbe vueiʹtte vaaikted sääʹmkulttuuʹre da äʹrbbvuõđlaž tiõttu. Suåvtõs valmštââll še ouddmiâsttâm-mõõntõõllmõõžž ooudâsviikkmõõžž.

Tuʹtǩǩeemeettlaž suåvtõõzz vuäzzla da väärrvuäzzla:

Vuäzzla

Pirita Näkkäläjärvi, saaǥǥjååʹđteeʹjj
Tauno Ljetoff, väärrsaaǥǥjååʹđteeʹjj
Heidi Eriksen
Inka Musta
Tuula-Maija Magga-Hetta

Väärrvuäzzla

Janne Hirvasvuopio
Tuomas Aslak Juuso
Leena Niittyvuopio-Jämsä
Marjaana Aikio
Nilla Tapiola

Lââʹssteâđaid vuäǯǯak:

Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi 

Edda Sundström
Sueʹrǧǧäʹšštobddi, EU-ääʹšš da õhttsallaš ouddmiâsttmõš (FPIC)
044 527 7078
edda.sundstrom@samediggi.fi