Sämitigge ocá arâšoddâdemaašij eromâšäššitobdee

Eromâšäššitobdee tuáimá sämmilii arâšoddâdem äššitobden uássin Sämitige sämimáttááttâs äššitobdeepargo. Arâšoddâdemaašij eromâšäššitobdee pargon lii valmâštâllâđ sämmilii arâšoddâdmân kyeskee aašijd, eromâšávt ovdâsvástádâssyergin sämmilij arâšoddâdempalvâlusâi turviimân já oovdedmân lohtâseijee ääših. Lasseen eromâšäššitobdee čuávu já oovded sämmilii arâšoddâdem sajattuv já olášume, hoittáá arâšoddâdem- já kielâpiervâltooimâ turviimân mieđettum meriruuđâi haaldâšmân, jyehimân já kocemân lohtâseijee staatâtoorjâvirgeomâháá pargoid, já tuáimá oovdânpyehten arâšoddâdemaašijn Sämitige sierâ toimâorgaanijn.

Arâšoddâdemaašij eromâšäššitobdee tuáimá noonâ oovtâstpargoost sämmilii arâšoddâdem pedagogiik eromâšäššitobdein.

Palvâluskoskâvuođâ tiäđuh

Pargo álgá sopâmuš mield nuuvt jotelávt ko máhđulâš. Virge tevdimist nuávdittuvvoo kuuđâ mánuppaje keččâlemäigi.

Arâšoddâdemaašij eromâšäššitobdee pargo lii Sämitige škovlimtoimâttuv vuálásâš.

Sämitige toimâpäikki lii Säämi kulttuurkuávdáš Sajosist, Anarist, mutâ pargo lii máhđulâš porgâđ uásild káidusin.

Occest mij vyerdip

Asâttâsân vuáđuduvvee tohálâšvuođâvátámâššân lii pargo vaattâm hiäivulâš škovlim já lasseen váttoo sämikielâ mättim (asâttâs 1727/95).

Virge miänástuvvee hoittám váátá hiäivulii ollâškovlâtotkos, šiev sämmilii arâšoddâdem já arâšoddâdmân kyeskee lahâasâttem tubdâm, šiev mättim haldâttuv äššitobdeepargoin tego toimâorgaan miärádâstoohâm valmâštâlmist, noonâ mättim staatâtorjui haaldâšmist já čuávumist.

Lasenahcân mii anneep áárvust naavcâ jiečânâs, ovdâsvástádâslii já olesvuođâid haldâšeijee pargovuáhán, šiev oovtâstpargo-, vuáruvaikuttâs- já ráđádâllâmtááiđuid sehe čielgâ kirjálii viestâdemtááiđu.

Pälkki

Pälkki miärášuvá Sämitige pälkkivuáháduv vátávâšvuotâtääsi IV/II mield (vuáđupälkki 2998,97 eurod/mp). Vuáđupäälhi lasseen máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh.

Uuccâm

Uuccâmluámáttuv, sehe rijjâtátulii, rijjâhámásii uuccâmreeivâ sehe máhđulii ánsuluvâttâllâm já eres lahtosijd (kirjálijd tuođâštusâid kielâtááiđust já totkosijn) kalga toimâttiđ Sämitige čäällimkoodán majemustáá 20.5.2026 räi taan uuccâmluámáttuv peht (lekkâs uđđâ laasân):

• Uuccâmluámáttâh

Lasetiäđui pargoost adelává haldâttâhjođetteijee Pia Ruotsala-Kangasniemi, pia.ruotsala@samediggi.fi, puh. 040 726 2688 já škovlimaašij eromâšäššitobdee Bigga-Helena Magga, bigga-helena.magga@samediggi.fi, puh. 040 570 2786

Sämitige tooimân puáhtá uápásmuđ nettičujottâsâst www.samediggi.fi

Anarist 20.4.2026
Sämitigge