Sämitigge pivdá kommentijd sämikielâi kiävtust jotolâhmeerhâin Aanaar kieldâst
Laapi eellimvyeimikuávdáš já Aanaar kieldâ valmâštâleh maađijjotoluv koolbâi almosvuávám Aanaar kieldâ kuávlust. Sämitigge lii ráhtám anonyym Webropol-koijâdâllâm sämikielâi kiävtust Laapi eellimvyeimikuávdáá haldâšem jotolâhmeerhâin Aanaar kieldâ kuávlust.
Koijâdâllâm vievâst nuurrâp Aanaar kieldâ sämmilijn kielâsiärvusijn uáinuid, vâi puáhtá miäruštâllâđ:
- Mii sämikielâid kiävttoo kieldâ jieškote-uv kuávlust tain koolbâin, main puáhtá kevttiđ tuš oovtâ sämikielâ.
- Sämikielâi oornig tain jotolâhmeerhâin, main puáhtá kevttiđ maŋgâ sämikielâ.
Sämitige Säämi kielârääđi täärhist koolbâi sämikielâlijd teevstâid já rävvee, mon kielâ/moh kielah kiävttoo/kiävttojeh kieldâ jieškote-uv kuávlust já mon oornigist kielah láá, jis koolbâin puáhtá kevttiđ eenâb ko ohtâ sämikielâ.
Kiäinuvirgáduv ravvui mield sämmilij päikkikuávlust jotolâhmeerhâin kiävttoo suomâkielâ lasseen sämikielâ, já kevttum sämikielâ väljejuvvoo meerhâ saje mield. Tábáhtus mield puáhtá päikkinommâkoolbâin kevttiđ Aanaar kieldâst suomâkielâ paaldâst maŋgâ sämikielâ, jis tot lii teknisávt máhđulâš já jotolâhtorvolâšvuođâ tááhust čielgâs.
Puoh koolbâin ij kuittâg paste kevttiđ maŋgâ kielâ: uápistemmeerhâin sehe sundedemtaavluin já määđhi kukkoduv čäittee taavluin puáhtá teknisij vátámušâi já jotolâhtorvolâšvuođâ tiet kevttiđ suomâkielâ paaldâst tuš oovtâ sämikielâ. Maŋgâ kielâ kevttim styereed koolbâ, ko ovdâmerkkân pustavij stuárudâh lii meridum ige tom pyevti ucediđ kielâmere mield.
➡️ Västid koijâdâlmân taa: https://link.webropolsurveys.com/S/F6C6926BEB4C5530
🗓️ Koijâdâllâm nohá 6.5.2026.
Lasetiäđuh:
Marko Marjomaa
Eromâšäššitobdee, sämikielâi ääših
marko.marjomaa(at)samediggi.fi
+358 50 438 2484
