Sääʹmteʹǧǧ räukk kommeeʹntid sääʹmǩiõl âânnmõõžžâst jååttlõkmiârkin Aanar kååʹddest
Lappi jieʹllemviõkk-kõõskõs da Aanar kåʹdd valmštâʹlle čuâǥǥasjååttlõõǥǥ čuâǥǥaskõõlbi takaiplaan Aanar kååʹdd voudda. Sääʹmteʹǧǧ lij raajjâm anonyym Webropol-kõõjjõõzz sääʹmǩiõli âânnmõõžžâst Lappi jieʹllemviõkk-kõõskõõzz vaaldšmem jååttlõkmiârkin Aanar kååʹdd vuuʹdest.
Kõõjjõõzzin noorât Aanar kååʹdd sääʹm ǩiõllõutstõõzzin vuäinlmid, što vueiʹtet meäʹrtõõllâd:
- Mõõn sääʹmǩiõl ââʹnet kååʹdd jeeʹres vuuʹdin tõin miârkin, koin vueiʹtet ââʹnned tåʹlǩ õõut sääʹmǩiõl.
- Sääʹmǩiõl jiârgg tõin jååttlõkmiârkin, koin vueiʹtet ââʹnned mäŋgg sääʹmǩiõl.
Sääʹmteeʹǧǧ Sääʹm ǩiõllsuåvtõs tääʹrǩast čuâǥǥaskõõlbi sääʹmǩiõllsaid teeʹkstid da vuäʹppast, mõõn sääʹmǩiõl/ǩiõlid ââʹnet kååʹdd jeeʹres vuuʹdin da måkam jiârǥâst ǩiõlid čuäʹjted, jõs miârkin vueiʹtet ââʹnned mäŋgg sääʹmǩiõl.
Ǩeäinnkonttâr vuäʹpstummuž mieʹldd sääʹm dommvuuʹdest jååttlõkmiârkin ââʹnet lääʹdd lââʹssen sääʹmǩiõl, da tõʹst ââʹnnem sääʹmǩiõll vaʹlljeet miârk sâjjõspääiʹǩ mieʹldd. Jeeʹrab tuʹmmstõõǥǥ mieʹldd, päiʹǩǩnõmmkõõlbin vueiʹtet Aanar kååʹddest ââʹnned mäŋgg sääʹmǩiõl, jõs miârk raajjmõš teeknlânji lij vueiʹtlvaž da jååttlõkstaanvuõđ lokku vääʹldeeʹl čiõlǥâs.
Pukin miârkin määŋg ǩiõl âânnmõš ij kuuitâǥ leäkku vueiʹtlvaž: vuäʹpstem-miârkin di teäʹttem- da mäʹtǩǩ-kõskk taaulin vueiʹtet teeknlaž õõlǥtõõzzi da jååttlõkstaanvuõđ diõtt lääʹdd kuâŋŋad ââʹnned tåʹlǩ õõut sääʹmǩiõl. Määŋg ǩiõl âânnmõš šuuʹrad miârk, ǥu ouddmiârkkân bukvai šorradvuõtt lij mieʹrruum ij-ǥa tõid vueiʹt ǩiõllmeäʹr mieʹldd uuʹcceed.
➡️ Vaʹstted kõõjjõʹsse täʹst: https://link.webropolsurveys.com/S/F6C6926BEB4C5530
🗓️ Kõõjjõs põõtt 6.5.2026.
Lââʹssteâđ:
Marko Marjomaa
Spesiaaläʹšštobddi, sääʹm ǩiõllääʹšš
marko.marjomaa(at)samediggi.fi
+358 50 438 2484
