Sämitigge uásálist OA biodiversiteetsopâmuš uásipeličuákkimân Armeniast

COP17 lii biodiversiteetsopâmuš alemus merideijee orgaan. Taan ive čuákkim lii merhâšittee, tastko tast ráhtoo vuossâmuš maailmvijđosâš árvuštâllâm Kunming-Montreal luándu maaŋgâhámásâšvuotâraami olášuttem ovdánmist. Čuákkimist kieđâvuššojeh eereeb iärrás luándu maaŋgâhámásâšvuođâ ruttâdem, biodiversiteetraami olášuttem sehe koččâmušah, moh lohtâseh algâaalmugáid já páihálâšsiärvusáid. 

Konferensist juátkoo meid pargo algâaalmugij uásálistem naanoodmân biodiversiteetsopâmuš olášutmist. Ovdebáá uásipeličuákkimist tuhhiittui historjálâš miärádâs pisováá išedeijee orgaan vuáđđudmist kieđâvuššâđ biodiversiteetsopâmuš artikkâl 8(j) olášuttem. Artikkâl 8 (j) kieđâvuš algâaalmugij já páihálâšsiärváduvâi uásálistem já ärbivuáválii tiäđu tooimâin, moh lohtâseh luándu maaŋgâhámásâšvuođâ suoijâlmân já kilelis kiävtun. 

– Algâaalmugij uđđâ pisováá orgaan vuáđudem lii historjálâš miärádâs. Tääl lii tehálâš visásmittiđ, ete uđđâ rááhtus naanood keevâtlávt algâaalmugij vuoigâdvuođâid, ärbivuáválii tiäđu sajattuv já uásálistem biodiversiteetsopâmuš olášutmân, iätá Sämitige saavâjođetteijee Pirita Näkkäläjärvi. 

Sämitigge oovded algâaalmugij vuoigâdvuođâid já uásálistem

Sämitige kuávdáš ulmeh čuákkimist láá algâaalmugij vuoigâdvuođâi já uásálistem turvim sehe toi sierânâs sajattuv huámmášumán väldim koskâvuođâst eres juávhoid, tego páihálâšsiärváduvváid. Eromâš huámmášume kiddejuvvoo algâaalmugij ärbivuáválii tiäđu kieđâvuššee uđđâ toimâorgaan, SB8(j), toimânjuolgâdussáid. 

– Uássin Suomâ airâskode mij tuárjup Suomâ já Euroop union uáivilij valmâštâllâm já pyehtip sämmilij uáinu ráđádâlmáid. Oovtâstpargo Suomâ airâskoddeest lii tehálâš uási mii aalmugijkoskâsii vaikuttempargoost, iätá Sämitige II värisaavâjođetteijee Tuomas Aslak Juuso. 

Čuákkimist Sämitigge uásálist Suomâ airâskode paargon, čuávu algâaalmugij tááhust kuávdáš ráđádâlmijd já parga oovtâstpargo eres sämmilij já algâaalmugij ovdâsteijeiguin. 

Sämitige čuákkimist ovdâstává II värisaavâjođetteijee Tuomas Aslak Juuso já aalmugijkoskâsij aašij sierânâsäššitobdee Inka Saara Arttijeff Suomâ airâskode uássin. 

Biodiversiteetsopâmuš stivree maailmvijđosii luándu maaŋgâhámásâšvuođâ suojâlem

OA biodiversiteetsopâmuš lii kuávdáš aalmugijkoskâsâš pirâssopâmuš, mii kuáská luándu maaŋgâhámásâšvuotân. Sopâmuš ulmen lii ekosysteemij ja šaddo- já elleešlaajâi suojâlem, luánduriggoduvâi kilelis kevttim já geenivaarij finnimvuođâst šaddee hiäđui vuoigâlâš já täsipiälásâš jyehim.  

Suomâst pirâsministeriö koordinist biodiversiteetsopâmuš vuálásijd ráđádâlmijd já Euroop union ráđádâlmijd luándu maaŋgâhámásâšvuotân kyeskee koččâmušâin. Aalmugijkoskâsijn luánduráđádâlmijn Suomâ ráđádâl uássin Euroop union. 

Sämitigge uásálist biodiversiteetsopâmušân lohtâseijee vaiguttempaargon já čuákkimân Suomâ airâskode uássin. Sämitige ulmen lii ovdediđ sämmilij vuoigâdvuođâi, ärbivuáválii tiäđu já uásálistem huámmášumán väldim luándu maaŋgâhámásâšvuotân kyeskee miärádâstohâmist. 

Lasetiäđuh biodiversiteetsopâmušâst kávnojeh pirâsministeriö nettisiijđoin: Kansainvälinen biodiversiteettipolitiikka (Aalmugijkoskâsâš biodiversiteetpolitiik)  

Lasetiäđuh:

Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi 

Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi 

Inka-Saara Arttijeff
Sierânâsäššitobdee, aalmugijkoskâsiih ääših
050 574 7629 / 010 839 3198
inka-saara.arttijeff@samediggi.fi