Sámediggi oassálastá ON:id biodiversitehtasoahpamuša oassebeallečoahkkimii Armenias
ON:id biodiversitehtasoahpamuša (Convention on Biological Diversity, CBD) 17. oassebeallečoahkkin (COP17) lágiduvvo Jerevanis Armenias 19.-30.10.2026. Čoahkkima fáddán lea Taking Action for Nature (Doaibma luonddu beales).
Sámedikki II várreságajođiheaddji Tuomas Aslak Juuso ja álbmogiidgaskasaš áššiid erenoamášáššedovdi Inka Saara Arttijeff COP17-čoahkkimis Jerevanis. Govva: Sámediggi.
COP17 lea biodiversitehtasoahpamuša bajimus mearrideaddji orgána. Dán jagi čoahkkin lea dehálaš, daningo doppe bargojuvvo vuosttas máilmmiviidosaš árvvoštallan Kunming-Montreala luonddu máŋggahámatvuođarápma ollašuhttima ovdáneamis. Čoahkkimis gieđahallat earret eará luonddu máŋggahámatvuođa ruhtadeami, biodiversitehtarápma ollašuhttima ja gažaldagaid, mat laktásit eamiálbmogiidda ja báikkálaš servošiidda.
Konferánssas joatkašuvvá maiddái bargu eamiálbmogiid oassálastima nannema várás biodiversitehtasoahpamuša ollašuhttimis. Ovddit oassebeallečoahkkimis dohkkehuvvui historjjálaš mearrádus vuođđudit bissovaš veahkkeorgána gieđahallat biodiversitehtasoahpamuša artihkal 8(j) ollašuhttima. Artihkal 8(j) gieđahallá eamiálbmogiid ja báikkálaš servošiid oassálastima ja árbedieđu luonddu máŋggahámatvuođa suodjaleapmái ja suvdilis geavaheapmái laktáseaddji doaibmabijuin.
– Eamiálbmogiid ođđa bissovaš orgána vuođđudeapmi lei historjjálaš mearrádus. Dál lea dehálaš sihkkarastit, ahte ođđa ráhkadus nanne geavatlaččat eamiálbmogiid vuoigatvuođaid, árbedieđu sajádaga ja oassálastima biodiversitehtasoahpamuša ollašuhttimii, dadjá Sámedikki ságajođiheaddji Pirita Näkkäläjärvi.
Sámediggi ovddida eamiálbmogiid vuoigatvuođaid ja oassálastima
Sámedikki dehálamos mihttomearit čoahkkimis leat eamiálbmogiid vuoigatvuođaid ja oassálastima sihkkarastin ja sin erenoamáš sajádaga vuhtiiváldin eará joavkkuid harrái, dego báikkálaš servošiid. Erenoamáš fuomášupmi giddejuvvo eamiálbmogiid árbedieđu gieđahalli ođđa doaibmaorgána, SB(j), doaibmanjuolggadusaide.
– Oassin Suoma sáttagotti, mii doarjut Suoma ja Eurohpa uniovnna oaiviliid válmmaštallama ja buktit sápmelaččaid oainnuid ráđđádallamiidda. Ovttasbargu Suoma sáttagottis lea dehálaš oassi min álbmogiidgaskasaš váikkuhanbarggus, dadjá Sámedikki II várreságajođiheaddji Tuomas Aslak Juuso.
Čoahkkimis Sámediggi oassálastá Suoma sáttagotti bargui, čuovvu eamiálbmogiid dáfus dehálaš ráđđádallamiid ja bargá ovttasbarggu eará sápmelaččaiguin ja eamiálbmogiid ovddasteaddjiiguin.
Sámedikki čoahkkimis ovddasteaba II várreságajođiheaddji Tuomas Aslak Juuso ja álbmogiidgaskasaš áššiid erenoamášáššedovdi Inka Saara Arttijeff oassin Suoma sáttagotti.
Biodiversitehtasoahpamuš stivre máilmmiviidosaš luonddu máŋggahámatvuođa suodjaleami
ON:id biodiversitehtasoahpamuš lea dehálaš álbmogiidgaskasaš luonddu máŋggahámatvuođa guoskevaš birassoahpamuš. Soahpamuša mihttomearrin lea ekosystema ja šaddo- ja eallišlájaid suodjaleapmi, luondduriggodagaid suvdilis geavahus ja genariggodaga oažžumis boahtti ávkkiid vuoiggalaš ja dásseveardásaš juohkin.
Suomas birasministeriija koordinere biodiversitehtasoahpamuša vuollásaš ráđđádallamiid ja Eurohpa uniovnna ráđđádallamiid gažaldagain, mat gusket luonddu máŋggahámatvuođa. Álbmogiidgaskasaš luondduráđđádallamiin Suopma ráđđádallá oassin Eurohpa uniovnna.
Sámediggi oassálastá biodiversitehtasoahpamuša guoskevaš váikkuhanbargui ja čoahkkimii oassin Suoma sáttagotti. Sámedikki mihttomearrin lea ovddidit sápmelaččaid vuoigatvuođaid, árbedieđu ja oassálastima vuhtiiváldima mearrádusbargamis, mii guoská luonddu máŋggahámatvuođa.
Lassidieđut biodiversitehtasoahpamušas gávdnojit birasministeriija neahttasiidduin: Álbmogiidgaskasaš biodiversitehtapolitihkka
Lassidieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi
Tuomas Aslak Juuso
II várreságajođiheaddji
040 687 3394
tuomas.juuso@samediggi.fi
Inka Saara Arttijeff
Erenoamášáššedovdi, álbmogiidgaskasaš áššit
050 574 7629 / 010 839 3198
inka-saara.arttijeff@samediggi.fi
