Niina Siivikko aalgât Sämitige saavâjođetteijee išedeijen
Sämitige saavâjođetteijee išedeijen aalgât Niina Siivikko. Pargo ovdil hoittám Laura Olsén-Ljetoff lii väljejum Sämitige iäláttâsčällee viirgán.
Sämitige saavâjođetteijee išedeijen lii nomâttum 7.9.2022 rääjist filosofia maister Niina Siivikko. Sämitigge almottij saavâjođetteijee išedeijee pargo uuccâmnáál kesimáánust. Meriääigi räi paargon pottii kyehti ucâmuš.
Haldâttâhhovdâ nomâttij saavâjođetteijee išedeijee Sämitige pargo-oornig 7 b § mield. Sämitige saavâjođetteijee išedeijee paargon kulá išediđ saavâjođetteijee sunjin uáivildum pargoin. Išedeijee valmâštâl já oovdânpuáhtá táárbu mield stiivrâ, tige já lävdikuudij čuákkimist jieijâs toimâsyergi aašijd sehe olášut tai miärádâsâid.
– Mun lam Avelist meddâl orroo sämmilâš náguskirjetotkee, veikâ majemui iivij ääigi láá sierâlágán pargoh olmoošvuoigâdvuođâi ooleest váldám iänááš muu ääigist, Siivikko muštâl.
Siivikko lii ovdil toimâm sierâlágán projektij koordinisten iärásij juávhust OA-liiton, sehe toimâm Tiervâsvuođâ já pyereestvaijeem lájádâs sehe riehtiministeriö pargojuávhuin eromâšávt arvetävginuorâi tile ooleest. Siivikko lii meid Olmoošvuoigâdvuotâlito stiivrâ jeessân.
– Mun lam tuođâi ilolâš tast, ete mun peesâm porgâđ Sämitiigán! Tot lii sämmilâžžân sehe stuorrâ kunnee já ovdâvuoigâdvuotâ, já mun lam tuođâi moovtâ taan hástusist, eromâšávt ko jiem lah ovdil porgâm Sämitiggeest. Toos lasseen mun lam hirmâd kijttevâš tast, ete pargo mield mun peesâm viettiđ eenâb ääigi tavveen perruu já ustevij kulen. Mun meid peesâm kevttiđ sämikielâ, mii lii Turkust asâdijnân ain hiäjusmin, Siivikko iätá.
Siivikko tuáimá saavâjođetteijee išedeijen toimâpaje 2020–2023 loopâ räi.
Laura Olsén-Ljetoff Sämitige iäláttâsčällen
Saavâjođetteijee išedeijen ovdil toimâm Laura Olsén-Ljetoff lii algâttâm Sämitige iäláttâsčällen 1.8.2022. Sämitige stivrâ valjij Olsén-Ljetoff iäláttâsčällee viirgán čuákkimstis 4/2022 (10.5.2022). Meriääigi räi viirgán pottii kulmâ ucâmuš.
Ohtâvuotâtiäđuh:
Niina Siivikko
Saavâjođetteijee išedeijee
puh. 010 839 3164 / 040 584 0697
niina.siivikko@samediggi.fi
Laura Olsén-Ljetoff
Iäláttâsčällee
puh. 010 839 3123 / 040 617 5113
laura.olsen-ljetoff@samediggi.fi
