Niina Siivikko alttad Sääʹmteeʹǧǧ saaǥǥjååʹđteei veäʹǩǩteeʹjen
Sääʹmteeʹǧǧ saaǥǥjååʹđteei veäʹǩǩteeʹjen alttad Niina Siivikko Tuâj ääiʹjben håiddam Laura Olsén-Ljetoff lij vaʹlljuum Sääʹmteeʹǧǧ jieʹllemvueʹǩǩpiisar vergga.
Sääʹmteeʹǧǧ saaǥǥjååʹđteei veäʹǩǩteeʹjen lij nõõmtum 7.9.2022 ääʹljeeʹl filosofia maister Niina Siivikko. Sääʹmteʹǧǧ piiʹji ooccâmnalla saaǥǥjååʹđteei veäʹǩǩteei tuâj ǩieʹssmannust. Mieʹrräigga mõõneeʹst tuõjju puõʹtte kuõʹhtt ooccmõõžž.
Vaaldâšmjååʹđteei nõõmti saaǥǥjååʹđteei veäʹǩǩteei Sääʹmteeʹǧǧ tuâjjriâššmõõžž 7 b § meâldlânji. Veäʹǩǩteei tuâjaid kooll vieʹǩǩted saaǥǥjååʹđteei suʹnne kuulli tuâjain. Veäʹǩǩteei valmštââll da čuäʹjtââll taarb mieʹldd halltõõzz, teeʹǧǧ da luʹvddkooʹddi såbbrin toiʹmmsuârggses kuulli aaʹššid di peejj tåimma tõi tuʹmmstõõǥǥid.
Leäm Âʹvvlest vuâlǥaž säʹmmlaž näʹǧǧtõsǩeʹrjjtuʹtǩǩeei, håʹt-i mââimõs iiʹjji lie tuâj jeeʹresnallšem ooumažvuõiggâdvuõđivuiʹm viikkâm jäänmõõzz ääiʹjstan, Siivikko särnn.
Siivikko lij ääiʹjben toiʹmmjam jeeʹresnallšem projeeʹkti koordinõʹsttjen jeeʹrab mieʹldd ÕM-littu, di toiʹmmjam Tiõrvâsvuõđ da pueʹrrvââjjamstroiʹttel di vuõiggâdvuõttministeria tuâjj-jooukin jeäʹrben âʹbrrjohssnuõri vuâkka kuuleeʹl. Siivikko lij še Ooumažvuõiggâdvuõttleett jååʹđtemkååʹdd vuäzzlaž.
- Leäm tuõđi miõlstan tõn diõtt, što piâzzam tuejjeed Sääʹmtegga! Tõt lij säʹmmliʹžžen nuʹtt jõnn cistt ko ouddvuõiggâdvuõtt, da leäm tuõđi älšmõõvvâm tän väʹǯǯlõs tuâjast, aainâs ko jiõm ääiʹjben leäkku Sääʹmteeʹǧǧest reâuggam. Tõn õõl leäm čuuʹt späʹssballaš tõn diõtt, što tuâj mieʹldd piâzzam ââʹnned jäänab ääiʹj tââʹvest piârri da taaurõõžži åʹrnn. Piâzzam še ââʹnned sääʹmǩiõl, koonn Turkust jälsteen pâi-i lij čackkâm årra, Siivikko ceälkk.
Siivikko toiʹmmai saaǥǥjååʹđteei veäʹǩǩteeʹjen tåimmpââʹj 2020–2023 loopp räjja.
Laura Olsén-Ljetoff Sääʹmteeʹǧǧ jieʹllemvueʹǩǩpiisren
Saaǥǥjååʹđteei veäʹǩǩteeʹjen ääiʹjben toiʹmmjam Laura Olsén-Ljetoff lij alttääm Sääʹmteeʹǧǧ jieʹllemvueʹǩǩpiisren 1.8.2022. Sääʹmteeʹǧǧ halltõs vaʹlljii Olsén-Ljetoff jieʹllemvueʹǩǩpiisar vergga såbbreʹstes 4/2022 (10.5.2022). Mieʹrräigga mõõneeʹst vergga puõʹtte kolmm ooccmõõžž.
Õhttvuõtt-teâđ
Niina Siivikko
Saaǥǥjååʹđteei veäʹǩǩteei
teʹl. 010 839 3164 / 040 584 0697
niina.siivikko@samediggi.fi
Laura Olsén-ljetoff
Jieʹllemvueʹǩǩpiisar
teʹl. 010 839 3123 / 040 617 5113
laura.olsen-ljetoff@samediggi.fi
