Nuorâirääđi saavâjođetteijeeh väljejum

Sämitige nuorâirääđi saavâjođetteijen väljejui Rosa-Máren Juuso Käresavonist já värisaavâjođetteijen Helmi Ljetoff Helsigist.  

– Mun porgâškuáđám nuorâirääđi saavâjođetteijen positiivlii já movtáskâm mieláin. Mun vuárdám čuuvtij puáttee toimâpaje já lam kijttevâš, ete finnejim luáttámuš juátkiđ saavâjođetteijen Anni-Sofia maŋa. Säminuorâi identiteet nanodem, kulttuur ovdedem já nuorâi pyereestvaijeem láá muu mielâst teháliih teemah mii tooimâst. Mun tuáivum, ete oovtâst mij pyehtip pyerediđ já ovdediđ taid uulmijd puáttee toimâpaajeest, muštâl nuorâirääđi saavâjođetteijen väljejum Rosa-Máren Juuso.  

Nuorâirääđi savâstâlâi čuákkimist meid valjâpaje mittomeerijn. Nuorâirääđi taha iävtuttâs jieijâs toimâsyergist Sämitige valjâpaje 2024–2027 toimâohjelmân.  

– Taan valjâpaajeest nuorâirääđi parga eromâšávt säminuorâi kielâ já identiteet nanodem já siäiluttem oovdân. Nuorâi uásálâšvuotâ miärádâstohâmist lii tehálii roolist sämikuávlu eellimvuáimálâšvuođâ oovdedmist já tom mij viggâp nanodiđ nuorâirääđi tooimâ peht, iätá värisaavâjođetteijen väljejum Helmi Ljetoff.  

Nuorâirääđi juátká meid pargo sämikielâlii nuorâipargo nanodem oovdân. Laapi kuávluhaldâttâhvirgádâh lii mieđettâm nuorâirááđán 46 500 euro ruttâdem sämikielâlii nuorâitooimâ oovdedmân.  De! 2 – Sämikielâlii nuorâipargo ovdedem sämikuávlu kieldâin -haavâst pilotisteh sämikielâlii já sämikulttuurân vuáđuduvvee nuorâipargo maali orniimáin tooimâ säminuoráid oovtâst sämikuávlu kieldâiguin. Haavâst olášuttoo sämikielâlâš nuorâipargo väldimáin nuorâid mieldi vuáváđ tooimâ siskáldâsâid.  

– Sämikielâlii nuorâipargo ovdedem lii lamaš ohtâ nuorâirääđi váldumittomeerijn moonnâm valjâpaajeest. Mij lep tuođâi iloliih haavâ ruttâdmist já tast, ete sämikuávlu kieldah vuolgii haahân mieldi. Čuákkimist mij vuáđudijm haahân stivrimjuávhu, moos mij táttup ovdâsteijeid sämmilij päikkikuávlu kieldâin já nomâttijm nuorâirääđist ovdâsteijeid. Mij tieđettep haavâst tärhibeht ko tot ovdán, juátká nuorâirääđi saavâjođetteijee Rosa-Máren Juuso. 

Nuorâirääđi valjij čuákkimstis rááđán meid äššitobdeejesânijd. Sämitige nuorâirääđi pargo-oornig mield nuorâirääđi puáhtá valjiđ rááđán kyevti ihán häävild enâmustáá vittâ pisováá äššitobdee. Nuorâirääđi äššitobdeejesâneh kalgeh leđe valjim ääigi 15–17-ihásiih. Nuorâirääđi äššitobden väljejuvvojii Tiia-Káren Alakorva, Leo Vilmunen, Mihku Näkkäläjärvi, Biret Juliánná Hætta já  Sárá-Májjá Pieski 

Nuorâirääđi toimâpaje 2024–2025 vuossâmuš čuákkim tollui 7.3.2024 Anarist. Uáppáásm čuákkim pevdikiirján taa.  

Čuákkim pevdikirje: Čuákkimeh | Saamelaiskäräjien nuorisoneuvosto 

Nuorâirääđi jesâneh toimâpaajeest 2024–2025: liŋkkâ Jesâneh | Saamelaiskäräjien nuorisoneuvosto  

Lasetiäđuh:  

Nuorâirääđi saavâjođetteijee 
Rosa-Máren Juuso
044 779 9420
rosa-maren.juuso(at)samediggi.fi   

Nuorâirääđi värisaavâjođetteijee
Helmi Ljetoff
helmi.ljetoff(at)samediggi.fi  

Nuorâičällee 
Elli-Marja Hetta
050 382 5179
elli-marja.hetta(at)samediggi.fi