Nuoraidráđi ságajođiheaddjit leat válljejuvvon

Sámedikki nuoraidráđi ságajođiheaddjin válljejuvvui Rosa-Máren Juuso Gárasavvonis ja várreságajođiheaddjin Helmi Ljetoff Helssegis.  

– Álggahan nuoraidráđi ságajođiheaddjin positiiva ja movttáskan mielain. Vuorddán iluin boahttevaš doaibmabaji ja lean giitevaš luohttámušas, man lean ožžon, go beasan joatkit ságajođiheaddjin Anni-Sofia maŋŋá. Sámenuoraid identitehta nannen, kultuvrra ovddideapmi ja nuoraid buresveadjin leat mu mielas guovddáš temát min doaimmas. Doaivvun, ahte ovttas mii sáhttit buoridit ja ovddidit daid ulbmiliid boahttevaš doaibmabaji áigge, muitala nuoraidráđi ságajođiheaddjin válljejuvvon Rosa-Máren Juuso.  

Nuoraidráđđi ságastalai čoahkkimis maiddái válgabaji ulbmiliid birra. Nuoraidráđđi dahká árvalusa iežas doaimmaide gullevaš áššiin Sámedikki válgabaji 2024–2027 doaibmaprográmmii.  

-Dán válgabaji áigge nuoraidráđđi bargá erenoamážit sámenuoraid giela ja identitehta nannema ja seailluheami ovdii. Nuoraid searvevuohta mearrádusdahkamis lea dehálaš rollas sámeguovllu ealaskasvuođa ovddideamis ja dan mii viggat nannet nuoraidráđi doaimma bokte, dadjá várreságajođiheaddjin válljejuvvon Helmi Ljetoff.  

Nuoraidráđđi joatká maid barggu sámegielat nuoraidbarggu nannema várás. Lappi guovlohálddahusdoaimmahat lea mieđihan nuoraidráđđái 46 500 euro ruhtadeami sámegielat nuoraiddoaimma ovddideapmái.  De! 2 – Sámegielat nuoraidbarggu ovddideapmi sámeguovllu gielddain -fitnus iskkadit sámegielat ja sámekultuvrii vuođđuduvvi nuoraidbarggu málle, nu ahte lágidit doaimma sámenuoraide ovttas sámeguovllu eará gielddaiguin. Fitnus ollašuhtto sámegielat nuoraidbargu dainna lágiin, ahte oažžut nuoraid searvat doaimma sisdoaluid plánemii.  

-Sámegielat nuoraidbarggu ovddideapmi lea leamaš okta nuoraidráđi váldoulbmiliin mannan válgabaji áigge. Mii leat ilolaččat fitnu ruhtadeamis ja das, ahte sámeguovllu gielddat vulge fidnui mielde. Čoahkkimis mii vuođđudeimmet fidnui stivrenjoavkku, masa mii bivdit ovddasteaddjiid sámiid ruovttuguovllu gielddain ja nammadeimmet nuoraidráđis ovddasteaddjiid. Mii dieđihat fitnu birra eanet go dat ovdána, joatká nuoraidráđi ságajođiheaddji Rosa-Máren Juuso. 

Nuoraidráđđi válljii čoahkkimis ráđđái maiddái áššedovdilahtuid. Sámedikki nuoraidráđi bargoortnega mielde nuoraidráđđi sáhttá válljet ráđđái guovtti jahkái hávil eanemustá vihtta bissovaš áššedovdi. Nuoraidráđi áššedovdit galget leat 15–17-jahkásaččat, go sii válljejuvvojit. Nuoraidráđi áššedovdin válljejuvvojedje Tiia-Káren Alakorva, Leo Vilmunen, Mihku Näkkäläjärvi, Biret Juliánná Hætta ja  Sárá-Májjá Pieski 

Nuoraidráđi doaibmabaji 2024–2025 vuosttas čoahkkin dollojuvvui 7.3.2024 Anáris. Oahpásmuva čoahkkima beavdegirjái dás:

Čoahkkima beavdegirji: Čoahkkimat | Saamelaiskäräjien nuorisoneuvosto 

Nuoraidráđi lahtut doaibmabaji 2024–2025 áigge: Lahtut | Saamelaiskäräjien nuorisoneuvosto  

Lassedieđut:   

Nuoraidráđi ságajođiheaddji
Rosa-Maren Juuso
044 7799420
rosa-maren.juuso(at)samediggi.fi   

Nuoraidráđi várreságajođiheaddji
Helmi Ljetoff
helmi.ljetoff(at)samediggi.fi   

Nuoraidčálli 
Elli-Marja Hetta
050 382 5179
elli-marja.hetta(at)samediggi.fi