Poccui kuáttumráávhu kalga turviđ spiekâstâhlijn tiilijn
Poccui kuáttumráávhu já puásuituálu almolijd toimâhinnáid kalga turviđ spiekâstâhlijn tiilijn. Sämitigge kiäsá Meccihaldâttâsân, ete tot kiäsádâđâččij taan kiiđâ já kesipaje uásild pivdo- já jotteemluuvij mieđeetmist sämmilij päikkikuávlust já pehtilittáččij kocceem lovettes jotteem estimân.
Taan täälvi lii Tave-Suomâst lamaš muotâ ennuv eenâb ko táválávt. Muotâtile já jieŋâkeerdih muottuu siste láá hettim já iästám poccui luándulii purrâmuš finnim eromâšávt tälvikuáttumkuávluin, main iä lah jievjâmeh. Taan tile tiet poccuuh láá hiäjub oornigist ko táválávt taan ääigi já tágárijn tiilijn poccuuh láá meid uáli heerkih ulguubeln puáttee hemâdâssáid.
”Taat tälvi lii eromâš vaigâd puásuituálleid já puoh paijeelmiärálâš hemâdâs toovât merhâšittee lasepargo. Ovdâmerkkân pivdoulmuuh tâi moottorkiälháin vyeijeeh sättih tovâttiđ tom, ete iälu pieđgân já taarbâšmettum jotteem hiäjusmit jo ovdiist hiäjus oornigist orroo poccuid já návt lasseet poccui jäämmim já lasepiemmâm táárbu”, iätá saavâjođetteijee Tuomas Aslak Juuso hästee tiileest.
Suomâ haldâttâs lii avžuuttâm, ete viruspandemia tiet kalga velttiđ puoh taarbâšmettum jotteem amas virus levâniđ. Sämitigge kiäsá-uv Meccihaldâttâsân, ete tot jaska tääl orroo spiekâstâhtiileest olgopäikkikode ulmuid čujottum lopevyebdim sämmilij päikkikuávlust sehe smietâččij jo vuobdum luuvij keessim maasâd taan kiiđâ já keesi uásild.
Toos lasseen Sämitigge ustevlávt avžuut Meccihaldâttâs pehtilittiđ lovettes já vaahâg tovâtteijee jotteem kocceem já stivriđ päikkikode ässeid meecist jotemist.
”Ličij meid tehálâš, ete päikkikode ulmuuh váldáččii tile huámmášumán. Ko jotá meecist, te kolgâččij kiddiđ huámmášume eromâš várugâsvuotân já huolâlâšvuotân, vâi puávtáččijm velttiđ paijeelmiärálij vahâgij tovâttem puásui-iäláttâsân, juátká II värisaavâjođetteijee Leo Aikio.
Sämitigge lii huolâstum olgopäikkikodálij pivdoulmui já astoääigi moottorkiälháin vyeijee ulmui taarbâšmettum jotemist sämmilij päikkikuávlust meid tááláá koronavirustile tiet. Jis koronavirus njuámuččij ovdâmerkkân ovtâskâs siijdâ uccâ puásuituálusiärvádâhân, te tot sátáččij leđe varâlâš ton oles siijdâ puásuituálun tááláá spiekâstâhtiileest.
Puásuituálu lii tehálâš uási sämikulttuur sehe meid Laapi já sämmilij purrâmuštorvo, purrâmušautonomia já meid kriisâtiileest Suomâ aalmuglii huolâttâsvisesvuođâ.
Sämitige áánnum Meccihaldâttâsân 1.4.2020 (suomâkielân)
Lasetiäđuh:
Saavâjođetteijee Tuomas Aslak Juuso puh. 040 687 3394, tuomas.juuos(at)samediggi.fi
II värisaavâjođetteijee Leo Aikio puh. 040 621 6505, leo.aikio(at)samediggi.fi
Kove: Tarja Länsman
