Saavâjođetteijee uásálist Taažâ Sämitige uđđâ vaaljâpaje lekkâmtilálâšvuotân
Suomâ Sämitige saavâjođetteijee Tuomas Aslak Juuso uásálist onne 20.10.2021 Kárášjuuvâst Taažâ Sämitige uđđâ vaaljâpaje lekkâmtilálâšvuotân.
Saavâjođetteijee tiäduttij jieijâs tiervâttâsâst sämmilij staatâi raajijd rastaldittee oovtâstpargo merhâšume já oovdânpuovtij tuoivuu Säämi parlamentaarlii rääđi pargo já haldâttuv naanoodmist puátteevuođâst.
Maaŋgah ääših já hástuseh kyeskih sämmiláid aalmugân staatâraajij rasta, já puoh kuulmâ Sämitige koskâsâš oovtâstpargo tai aašij ooleest lii eromâš tehálâš, paahud Juuso savâstis.
Juuso pajedij oovdân ovdâmeerhâid meid majemui aaigij positiivlii ovdánmist sämmilij vuoigâdvuođâ olášume uásild já pahudij, ete toh čäittih Sämitige já vijđásubbooht sämisiärváduv pargo merhâšume. Veikâ nubástus tábáhtuvá hitásávt, te tot liijká tábáhtuvá, eeđâi Juuso.
Meid Sämitige I värisaavâjođetteijee Anni Koivisto uásálist lekkâmtilálâšvuotân Barents algâaalmugpargojuávhu ovdâsteijen.
