Sämitige saavâjođetteijee sajasâš Juuso teeivâi Kanada algâaalmugij palvâlusâin västideijee minister Anarist
Kanada algâaalmugij palvâlusâin västideijee minister Patty Hajdu kollij delegaatioinis Anarist kuovâmáánu 20.–21. peeivi. Kollim ääigi delegaatio teeivâi ei. Sämitige saavâjođetteijee sajasii Tuomas Aslak Juuso já nuorâirääđi värisaavâjođetteijee Niila-Juhán Valkeapää.
Minister Hajdu delegaatio já Sämitige teivâdem Anarist kuovâmáánu 20. peeivi. Kove: Johanna Alatorvinen / Sämitigge.
– Muu mielâst lii pyeri, ete Sämitigge kiäsut gloobaal tääsist já mii majemui aaigij oovtâstpargo Kanadain uáinoo tääl meid taan kollim peht, iätá Sämitige saavâjođetteijee sajasâš Juuso.
Vuossâmuu peeivi teivâdmist sii uápásmii Sämitige tooimân, ärbivuáváláid iäláttâssáid, nuorâirääđi tooimân, Sämitige aalmugijkoskâsii paargon sehe kilelis sämimaađhâšmân. Sämitiggeest teivâdmân uásálistii saavâjođetteijee sajasâš Tuomas Aslak Juuso, aalmugijkoskâsij aašij čällee Inka Saara Arttijeff, vuávájeijee Kirsi Suomi, viestâdemčällee Johanna Alatorvinen, saavâjođetteijee išedeijee Niina Siivikko sehe nuorâirääđi värisaavâjođetteijee Niila-Juhán Valkeapää já jeessân Sárá-Márjá Keskitalo.
– Mist lijjii mielâkiddiivááh savâstâlmeh ei. algâaalmugij oovdâstmist. Mun lam eromâš ilolâš tast, ete delegaatiost lijjii mieldi meid algâaalmugij ovdâsteijeeh já mij peesâim jyehiđ jieččân vuáttámušâid, iätá Juuso.
Vástuppeeivi kuovâmáánu 21. peeivi minister Hajdu delegaatio kollij värisaavâjođetteijee Leo Aikio kulen já uápásmij pyerebeht puásuituálun. Toos lasseen saavâjođetteijee sajasâš Juuso uásálistij minister kyessin koskâpeivimäälisteivâdmân, kost savâstâllui sämmilij sosiaal- já tiervâsvuođâpalvâlusâin já psykososiaallii torjust. Sämitiggeest teivâdmân uásálistijn meid sosiaal- já tiervâsvuođâčällee Riitta Lehtola-Kosonen já vs. sosiaal- já tiervâsvuođâčällee Anni Koivisto.
Koskâpeivimäälisteivâdem Anarist kuovâmáánu 21. peeivi.
Minister Hajdu delegaatiost lijjii minister toimâttuvâst meid ovdâkoddehovdâ (Chief of Staff) Randi Anderson sehe toimâjođetteijee (Director of Operations) Christi Barasaba, kyehti algâaalmugovdâsteijee: Michelle Kovacevic, Associate Deputy Minister (Indigenous Services Canada) sehe Harold Calla, Executive Chair (First Nations Financial Management Board) já business-maailm ovdâsteijee Dayna Griffiths. Teivâdmáid uásálistii meid Kanada stuorrâvuolgâttuvâst stuorrâvuolgâttâhhovdâ Janette Stovel, raavâadeleijee Thomas Laith Gagnon já olgopolitiik -já diplomaatvästideijee Helmi Rantala.
Lasetiäđuh:
Tuomas Aslak Juuso
Saavâjođetteijee sajasâš
040 687 3394
tuomas.juuso@samediggi.fi
Inka-Saara Arttijeff
Aalmugijkoskâsij aašij čällee
050 574 7629 / 010 839 3198
inka-saara.arttijeff@samediggi.fi
