Sámedikki ságajođiheaddji sadjásaš Juuso deaivvadii Kanáda eamiálbmogiid bálvalusain vástideaddji ministariin Anáris
Kanáda eamiálbmogiid bálvalusain vástideaddji ministtar Patty Hajdu galledii delegašuvnnainis Anáris guovvamánu 20.–21.beaivve. Galledeami áigge delegašuvdna deaivvadii ee. Sámedikki ságajođiheaddji sadjásaš Tuomas Aslak Juusoin ja nuoraidráđi várreságajođiheaddji Niila-Juhán Valkeapääin.
Ministtar Hajdu delegašuvnna ja Sámedikki deaivvadeapmi Anáris guovvamánu 20. beaivve. Govva: Johanna Alatorvinen / Sámediggi.
– Mu mielas lea fiinna ášši, ahte globála dásis leat beroštuvvan Sámedikkis ja min maŋimuš áiggiid ovttasbargu Kanádain oidno dál maiddái dán galledeamis, muitala Sámedikki ságajođiheaddji sadjásaš Juuso.
Vuosttas beaivve deaivvadeamis delegašuvdna oahpásmuvai Sámedikki doibmii, árbevirolaš ealáhusaide, nuoraidráđi doibmii, Sámedikki riikkaidgaskasaš bargui ja suvdilis sámemátkeealáhussii. Sámedikki deaivvadeapmái oassálaste ságajođiheaddji sadjásaš Tuomas Aslak Juuso, riikkaidgaskasaš áššiid čálli Inka Saara Arttijeff, plánejeaddji Kirsi Suomi, dieđihančálli Johanna Alatorvinen, ságajođiheaddji veahkkebargi Niina Siivikko ja dan lassin maiddái nuoraidráđi várreságajođiheaddji Niila-Juhán Valkeapää ja lahttu Sárá-Márjá Keskitalo.
– Mis ledje miellagiddevaš ságastallamat ee. eamiálbmogiid ovddastusa birra. Ledjen hui movtta das, go delegašuvnnas ledje fárus maiddái eamiálbmogiid ovddasteaddjit, ja mii beasaimet juogadit iežamet vásáhusaid gaskaneamet, dadjá Juuso.
Bearjadaga guovvamánu 21. beaivve ministtar Hajdu galledii várreságajođiheaddji Lea Aikio luhtte ja oahpásmuvai lagabut boazodollui. Dan lassin ságajođiheaddji sadjásaš Juuso oassálasttii lunšša olis deaivvadeapmái, gosa ministtar lei bovden su. Deaivvadeami oktavuođas ságastallui psykososiálalaš doarjagis. Sámedikkis deaivvadeapmái oassálasttiiga maiddái sosiála- ja dearvvasvuođačálli Riitta Lehtola-Kosonen ja vs. sosiála- ja dearvvasvuođačálli Anni Koivisto.
Deaivvadeapmi lunšša oktavuođas Anáris guovvamánu 21. beaivve.
Ministtar Hajdu delegašuvdnii gulle ministara kantuvrras maiddái ovdagoddehoavda (Chief of Staff) Randi Anderson sihke doaibmajođiheaddji (Director of Operations) Christi Barasaba, guokte eamiálbmotovddasteaddji: Michelle Kovacevic, Associate Deputy Minister (Indigenous Services Canada) sihke Harold Calla, Executive Chair (First Nations Financial Management Board) ja businessmáilmmi ovddasteaddji Dayna Griffiths. Dan lassin deaivvademiide oassálaste Kanáda ambassádas ambassadevra Janette Stovel, ráđđeaddi Thomas Laith Gagnon ja olgoriikkapolitihkka- ja diplomáhtavástideaddji Helmi Rantala.
Lassidieđut:
Tuomas Aslak Juuso
Ságajođiheaddji sadjásaš
040 687 3394
tuomas.juuso@samediggi.fi
Inka Saara Arttijeff
Riikkaidgaskasaš áššiid čálli
050 574 7629 / 010 839 3198
inka-saara.arttijeff@samediggi.fi
