Sämitige saavâjođetteijee toolâi saavâ Säämi ollâškoovlâ lekkâmijn já uásálistij Čoarvemátta-rakânâs lekkâmtilálâšvuotân
Kooveest Kuovdâkiäinu kieldâstiivrâ saavâjođetteijee Anders Samuelsen Buljo (čiž.), Taažâ Sämitige stiivrâ jeessân Mikkel Eskil Mikkelsen, Säämi ollâškoovlâ rehtor Liv Inger Somby, Suomâ Sämitige saavâjođetteijee Pirita Näkkäläjärvi, Sämirääđi saavâjođetteijee Áslat Holmberg, Säämi ollâškoovlâ värirehtor Samuel Valkeapää, Taažâ arktâsii ollâopâttuv värirehtor Bente Haug já Säämi ollâškoovlâ jođetteijee Anne-Marie Gaino.
Sämitige saavâjođetteijee Pirita Näkkäläjärvi uásálistij Säämi ollâškoovlâ (Sámi allaskuvla) luuhâmive 2024–2025 lekkâmáid koskoho 21.8. Kuovdâkiäinust Taažâbeln.
Näkkäläjärvi toolâi lekkâmijn saavâ Suomâ Sämitige já Säämi parlamentaarlii rääđi saavâjođetteijen. Savâstis Näkkäläjärvi pajedij oovdân Säämi ollâškoovlâ stuorrâ merhâšume oles Sáámán.
– Lii eromâš tehálâš, ete mist lii jieččân ollâškovlâ, mii čuákkee oohtân nuorâid pirrâ vijđes Säämi. Lii tehálâš, ete mist lii ollâškovlâ, mii naanood puoh toimâidiskuin sämikielâid, já oovded máttááttâs já tutkâmuš, moi tuáváást lii sämmilâš jurdâččemvyehi. Säämi ollâškovlâ naanood oles sämisiärváduv raajij rasta, eeđâi Näkkäläjärvi savâstis.
Näkkäläjärvi muštâlij savâstis, ete Suomâ Sämitigge tuárju Säämi ollâškoovlâ viggâmušâid puáttiđ ollâopâttâhhân puátteevuođâst.
– Taat nanodičij jieijâs uásild meid sämmilij jiešmeridem.
Tilálâšvuođâst saavâid tollii Säämi ollâškoovlâ jođetteijee Anne-Marie Gaino, rehtor Liv Inger Somby, Taažâ Sämitige saavâjođetteijee Silje Karine Muotka, Sämirääđi saavâjođetteijee Áslat Holmberg, Kuovdâkiäinu kieldâstiivrâ saavâjođetteijee Anders Samuelsen Buljo já Taažâ arktâsii ollâopâttuv värirehtor Bente Haug.
Saavâjođetteijee Näkkäläjärvi uásálistij Kuovdâkiäinust meid Čoarvemátta-rakânâs lekkâmáid. Čoarvemátta lii sämmilij aalmugteatter Beaivváš Sámi Našunálateáhterin sehe Säämi koskâtääsi škoovlâ já puásuituáluškoovlâ uđđâ rakânâs.
Čoarvemátta uáivild čuárvi madduu, já poccuučuárvi maadâ lii-uv tuáváást sehe uđđâ rakânâs noomâst já arkkitehtuurist.
Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi
