Sámedikki ságadoalli doalai sáhkavuoru Sámi allaskuvlla rahpandoaluin ja oassálasttii Čoarvemátta-vistti rahpandilálašvuhtii
Govas Guovdageainnu ságadoalli Anders Samuelsen Buljo (gur.), Norgga Sámedikki stivrra lahttu Mikkel Eskil Mikkelsen, Sámi allaskuvlla rektor Liv Inger Somby, Suoma Sámedikki ságadoalli Pirita Näkkäläjärvi, Sámiráđi ságadoalli Áslat Holmberg, Sámi allaskuvlla várrerektor Samuel Valkeapää, UiT Norgga árktalaš universitehta várrerektor Bente Haug ja Sámi allaskuvlla direktevra Anne-Marie Gaino.
Sámedikki ságadoalli Pirita Näkkäläjärvi oassálasttii Sámi allaskuvlla oahppojagi 2024–2025 rahpandoaluide gaskavahku 21.8. Guovdageainnus Norggas.
Näkkäläjärvi doalai rahpandoaluin sáhkavuoru Suoma Sámedikki ja Sámi parlamentáralaš ráđi ságadoallin. Sáhkavuorustis Näkkäläjärvi loktii ovdan Sámi allaskuvlla stuorra mearkkašumi olles Sápmái.
– Lea hui dehálaš, ahte mis lea iežamet allaskuvla, mii čohkke oktii nuoraid miehtá viiddes Sámi. Lea dehálaš, ahte mis lea allaskuvla, mii nanne buot iežas doaimmain sámegielaid, ja ovddida oahpahusa ja dutkamuša, mas lea vuođđun sámi jurddašeapmi. Sámi allaskuvla nanne olles sámi servoša rastá rájáid, Näkkäläjärvi dajai sáhkavuorustis.
Näkkäläjärvi muitalii sáhkavuorustis, ahte Suoma Sámedikkis doarjut Sámi allaskuvlla figgamušaid šaddat universitehtan boahtteáiggis
– Dát nannešii iežas oasil maid sámi iešmearrideami.
Dilálašvuođas sáhkavuoruid dolle Sámi allaskuvlla direktevra Anne-Marie Gaino, rektor Liv Inger Somby, Sámiráđi ságadoalli Áslat Holmberg, Guovdageainnu ságajođiheaddji Anders Samuelsen Buljo ja UiT Norgga árktalaš universitehta várrerektor Bente Haug.
Ságadoalli Näkkäläjärvi oassálasttii Guovdageainnus maiddái Čoarvemátta-vistti rahpandilálašvuhtii. Čoarvemátta lea Beaivváš Sámi Našunálateáhtera ja Sámi joatkkaskuvlla ja boazodoalloskuvlla ođđa visti.
Bohccočoarvvi čoarvemátta lea vuolggasadjin ođđa vistti namas ja arkitektuvrras.
Lassedieđut:
Pirita Näkkäläjärvi
Ságadoalli
044 753 3766
pirita.nakkalajarvi@samediggi.fi
