Sämitige saavâjođetteijeeh teivâdii uáiviminister Petteri Orpo

Sämitige saavâjođetteijee Pirita Näkkäläjärvi (uálg.), I värisaavâjođetteijee Leo Aikio (kaskoo) já II värisaavâjođetteijee Tuomas Aslak Juuso (čiž.) teivâdii uáiviminister Petteri Orpo (kok) Staatârääđi lanneest. Kove: Niina Siivikko / Sämitigge

Sämitigge já uáiviminister Petteri Orpo teivâdii vuossâmuu tove taan valjâpaajeest. Sämitige ovdâstii saavâjođetteijee Pirita Näkkäläjärvi, I värisaavâjođetteijee Leo Aikio, II värisaavâjođetteijee Tuomas Aslak Juuso, lahâčällee Kalle Varis já saavâjođetteijee išedeijee Niina Siivikko.

Teivâdmist savâstâllii Sämitige budjetist, sämitiggelahâiävtuttâsâst já sämikuávlu eellimvyeimi oovdedmist.

Vuossâmuš savâstâllâm kuoskâi toos, ete staatâvarijministeriö budjetiävtuttâsâst iävtutteh Sämitiigán 568 000 euro čuoppâmijd.

– Mij puovtijm uáiviministerân oovdân mii huolâ tast, ete iävtuttum budjetčuoppâmeh čyeccih Sämitige jiešhaldâšem ruttâdmân já Sämitige lahâaasâtláid pargoid. Mij iberdep, ete puohah kalgeh uásálistiđ šiäštoid, mutâ piivdijm vala suogârdâllâđ, ete puávtáččii-uv Sämitiigán čyeccee čuoppâmijd toohâđ kuáhtulubbon, iätá saavâjođetteijee Näkkäläjärvi.

Nubben fáddán lâi sämitiggelahâiävtuttâs, mii lii uási uáiviminister Orpo haldâttâsohjelmist.

– Mist lâi pyeri savâstâllâm sämitiggelahâiävtuttâs ovdánmist. Mij puovtijm oovdân jieččân tuoivuu, ete sämitiggelahâiävtuttâs kieđâvuššâm ovdâskoddeest puávtáččij jotkuđ tállân tääl, ko vaaljah láá uárnejum uđđâsist, já ete laahâ puáđáččij vuáimán nuuvt jotelávt ko máhđulâš. Mij meid muštottijm, ete äigitavlu ij killáá innig ájánem, iätá I värisaavâjođetteijee Leo Aikio.

Loopâst sij savâstâllii sämmilij päikkikuávlu eellimvyeimi oovdedmist.

– Mij muštâlijm uáiviministerân, ete Sämitigge haalijd väldiđ aktivlub rooli sämikuávlu eellimvyeimi oovdedmist. Mii jurduuh tast, maht ovdediđ ovdâmerkkân movtijditteid, maalijd já pargoniävuid sämmilij irâtteijeevuođâ tuárjum várás, váldojii pyereest vuástá, iätá II värisaavâjođetteijee Tuomas Aslak Juuso.

Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi