Sámedikki ságajođiheddjijoavku deaivvadii stáhtaministtar Petteri Orpoin

Sámedikki ságajođiheaddji Pirita Näkkäläjärvi (olg.), I várreságajođiheaddji Leo Aikio (gasku) ja II várreságajođiheaddji Tuomas Aslak Juuso (gur.) deaivvadedje stáhtaministtar Petteri Orpo (kok) Stáhtaráđi šloahtas. Govva: Niina Siivikko / Sámediggi

Sámediggi ja stáhtaministtar Petteri Orpo deaivvadedje vuosttas háve dán válgabajis. Sámedikki ovddastedje ságajođiheaddji Pirita Näkkäläjärvi, I várreságajođiheaddji Leo Aikio, II várreságajođiheaddji Tuomas Aslak Juuso, láhkačálli Kalle Varis ja ságajođiheaddji veahkkebargi Niina Siivikko.

Deaivvadeamis ságastallui Sámedikki bušeahtas, sámediggeláhkaevttohusas ja sámeguovllu eallinfámu ovddideamis.

Vuosttas ságastallan guoskkai dan, go ruhtaministeriija bušeahttaevttohusas evttohuvvojit Sámediggái 568 000 euro čuohppamat.

– Mii ovdanbuvttiimet stáhtaministarii iežamet fuola das, ahte evttohuvvon bušeahttačuohppamat čuhcet Sámedikki iešráđđema ruhtadeapmái ja Sámedikki lágas ásahuvvon bargguide. Mii áddet, ahte buohkat galget oassálastit oktasašseastimiidda, muhto bivddiimet vel guorahallat, sáhtášiigo Sámediggái guoski čuohppamiid dahkat govttolabbon, muitala ságajođiheaddji Näkkäläjärvi.

Nubbin fáddán lei sámediggeláhkaevttohus, mii lea stáhtaministtar Orpo ráđđehusprográmma oassi.

– Mii ságastalaimet buori vuoiŋŋas sámediggeláhkaevttohusa ovdáneamis. Ovdanbuvttiimet sávaldaga, ahte sámediggeláhkaevttohusa gieđahallan riikkabeivviin sáhtášii joatkašuvvat dalán dál, go ođđa válggat leat doaimmahuvvon, ja ahte láhka boađášii fápmui nu jođánit go vejolaš. Mii muittuheimmet, ahte áigetávvala ii sáhte šat maŋidit, muitala I várreságajođiheaddji Leo Aikio.

Loahpas vel ságastalaimet sámiid ruovttuguovllu eallinfámu ovddideamis.

– Mii muitaleimmet stáhtaministarii, ahte Sámediggi háliida váldit aktiivvalut rolla sámeguovllu eallinfámu ovddideamis. Oaččuimet buorre vuostáiváldima min ideaidda das, man láhkai ovddidit ovdamearkan movttiidahttinvuogádagaid, málliid ja bargoneavvuid sámi fitnodatdoaimma doarjuma várás, muitala II várreságajođiheaddji Tuomas Aslak Juuso.

Lassedieđut:
Pirita Näkkäläjärvi
Ságajođiheaddji
044 7533 766
pirita.nakkalajarvi@samediggi.fi