Sämitige stivrâ savâstâlâi vuáháduttemtooimâin já meridij asâttiđ ohtsâštoimâmorgaan

Sämitige stivrâ joođhij ráhtádâttâm staatâekonomia puáttee vuáháduttemtoimáid. Porgemáánu aalgâst almostum staatâvarijministeriö budjetiävtuttâsâst iävtutteh Sämitiigán 568 000 euro čuoppâmijd.

– Mij lep huolâstum tast, ete iävtuttum paijeel pele miljovn euro budjetčuoppâmeh čyeccih Sämitige jiešhaldâšem ruttâdmân já Sämitige lahâaasâtláid pargoid. Mij iberdep, ete puohah kalgeh uásálistiđ šiäštoid, mutâ mij tuáivup, ete haldâttâs já ovdâskodde taheh kuáhtulubbon Sämitiigán čyeccee čuoppâmijd, iätá saavâjođetteijee Näkkäläjärvi.

Sämitige stivrâ savâstâlâi vuáháduttemvuávám algamudo siskáldâsâst.

– Mij viggâp uuccâđ máhđulijd šiäštuid puáttee ihán eereeb iärrás čuákkimkoloin, tave-eennâmlii sämikielâi äššitobdeeorgaan Kielâkäldee koloin sehe haldâttâhkoloin, iätá saavâjođetteijee Näkkäläjärvi.

Sämitige stivrâ asâttij čuákkimist laavâ ohtsâštoimâmist staatâ virgáduvâin já lájádâsâin adelum laavâ 7 § uáivildem ohtsâštoimâmorgaan. Ton tooimânkoččomin lii kieđâvuššâđ ohtsâštoimâmlaavâ mield ruttâdem čuoppâmijd, moh staatâ budjetiävtuttâsâst láá čujottum Sämitiigán. Stivrâ piivdij pargeid nomâttiđ jieijâs ovdâsteijeid ohtsâštoimâmorgaanân.

– Ohtsâštoimâmorgaan asâttem vievâst mij ráhtádâttâp máhđulij šiäštutooimâi vuáváámân já olášutmân ohtsâštooimâst pargeiguin, iätá saavâjođetteijee Näkkäläjärvi.

Stivrâ tuhhiittij čuákkimist meid sämikielâláid sosiaal- já tiervâsvuođâpalvâlussáid lohtâseijee iävtuttâsâid já alguid, nomâttij Maarit Kiprianoff Sämitige ovdâsteijen nuorttâlâškulttuursiättus stiivrân pajan 2025–28 já kieđâvušâi škovlim- já oppâmateriaaltoimâttuv tile.

Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi