Sámedikki stivra ságastalai seastindoaimmain ja mearridii ovttasdoaibmanorgána ásaheamis

Sámedikki stivra jotkkii ráhkkaneami stáhtaekonomiija boahttevaš seastindoaimmaide.  Borgemánu álggus olggosaddon ruhtaministeriija bušeahttaevttohusas evttohuvvojit Sámediggái 568 000 euro čuohppamat.

– Mii leat fuolas das, ahte evttohuvvon badjel bealle miljovnna bušeahttačuohppamat čuhcet Sámedikki iešráđđema ruhtadeapmái ja Sámedikki lágas ásahuvvon bargguide. Mii áddet, ahte buohkat galget oassálastit oktasašseastimiidda, muhto sávvat, ahte ráđđehus ja riikkabeaivvit rievdadit govttolabbon Sámediggái guoski čuohppamiid, dadjá sátnejođiheaddji Näkkäläjärvi.

Sámedikki stivra ságastalai álgomuttu seastinplána sisdoalus.

– Mii geahččalit ohcat vejolaš seastimiid boahtte jahkái earret eará čoahkkingoluin, davviriikkaid oktasaš sámegielaid áššedovdiorgána Giellagáldu goluin ja maiddái hálddahusgoluin, muitala sátnejođiheaddji Näkkäläjärvi.

Sámedikki stivra ásahii čoahkkimis ovttasdoaibmanorgána ovttasdoaibmamis stáhta  virgebáikkiin ja lágádusain addojuvvon lága 7 §:a mielde. Dan bargun lea gieđahallat ovttasdoaibmanlága mielde Sámediggái stáhta bušeahttaevttohusas árvaluvvon ruhtadeami čuohppamiid.  Stivra bivddii, ahte bargoveahka nammada iežas ovddasteaddji ovttasdoaibmanorgánii.

– Ovttasdoaibmanorgána ásaheami bakte mii ráhkkanit vejolaš seastindoaimmaid plánemii ja ollašuhttimii ovttasdoaibmamiin bargoveagain, muitala sátnejođiheaddji Näkkäläjärvi.

Stivra dohkkehii maiddái čoahkkimis sámegielat sosiála- ja dearvvasvuođabálvalusaide laktáseaddji evttohusaid ja álgagiid, nammadii Maarit Kiprianoff Sámedikki ovddasteaddjin Nuortalaškulturvuođđudusa stivrii badjái 2025-28 ja gieđahalai skuvlen- ja oahppamateriáladoaimmahaga dili.

Lassidieđut:
Pirita Näkkäläjärvi
Sátnejođiheaddji
044 753 3766
pirita.nakkalajarvi@samediggi.fi