Sämitige stivrâ tuhhiittij Sämitige ornijdemčuákkim äššilisto
Sämitige stivrâ čokkânij vuossaargâ 2.9. ive lovváád čuákkimân káidusohtâvuođâiguin. Äššilistoost lâi tuš ohtâ äšši, Sämitige ornijdemčuákkim valmâštâllâm.
Sämitige stivrâ čokkânij äššilistostis tuš ohtâ äšši, toimâpajan 1.9.2024–31.12.2027 asâttum Sämitige ornijdemčuákkim valmâštâllâm. Stivrâ tuhhiittij čuákkimist ornijdemčuákkim äššilisto.
Ornijdemčuákkim liäkká kuhemustáá Sämitige jesânin toimâm jeessân Anne Nuorgam Ucjuuvâst. Nuorâi sahâvuáruid toollâv Sämitige nuorâirääđi valjim ovdâsteijeeh Rosa-Máren Juuso Iänuduvâst já Mihku Näkkäläjärvi Anarist.
Ornijdemčuákkim äššilistoost láá eereeb iärrás saavâjođetteijee já kyehti värisaavâjođetteijee sehe stiivrâ nelji eres jeessân valjiimeh. Lasseen iävtuttâsâst lii, ete Sämitigge aasât ornijdemčuákkimstis iäláttâs- já vuoigâdvuotâlävdikode, škovlim- já oppâmateriaallävdikode, kulttuurlävdikode, säämi kielârääđi, sosiaal- já tiervâsvuođâlävdikode sehe nuorârääđi já noomât ovdâsteijeid čuávuváid toimâorgaanáid teikâ pargojuávhoid: säämi parlamentaarlâš räädi, pispekoddeváldustivrâ já kirholâščuákkim, sämmilij škovlimaašij oovtâstpargo-orgaan, sämmilij sosiaal- já tiervâsvuođâaašij oovtâstpargo-orgaan, anarâšaašij ráđádâllâmkodde, eettisij ravvui toimâorgaan, Baareents euroarktâsii rääđi algâaalmugij pargojuávkku já Säämi Kielâkäldee stivrâ.
Äššilisto mield Sämitige čuákkim kieđâvuš ornijdemčuákkimist meid valjâpaje toimâohjelm 2024–2027.
Toimâpajan 1.9.2024–31.12.2027 asâttum Sämitige ornijdemčuákkim tuálloo 23.9.2024 tme 10 rääjist Anarist, Saijoosist. Čuákkim juátkoo táárbu mield 24.9.2024.
Sämitige čuákkim oovdâst Sämitige alemus meridemvääldi. Tot čokkân 4-5 keerdi ivveest. Čuákkimeh láá almoliih já taid puáhtá čuávvuđ pääihi alne parlamentsalist tâi Zoom-webinaar peht. Parlamentsali tulkkumpiergâseh láá almolávt kiävtust. Njuolgâ vuolgâttâs peht puáhtá kuldâliđ tulkkum kielâ salist kullum kielâ lasseen. Sämitige tievâsčuákkimeh tulkkojuvvojeh suomâkielân já kuulmâ Suomâst ellee sämikielân (nuorttâlâš-, anarâš- já tavesämikielâ). Čuákkimäššikirjeh kávnojeh dokumentijn tääbbin.
Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
