Sääʹmteeʹǧǧ halltõs priimi riâššõõttâmsåbbar äʹššliist
Sääʹmteeʹǧǧ halltõs noorõõđi vuõssaarǥ 2.9. eeʹjj lååǥǥad såbbra ougglõsõhttvuõđivuiʹm. Äʹššliist âʹlnn leäi tåʹlǩ õhtt äʹšš, Sääʹmteeʹǧǧ riâššõõttâmsåbbar valmštõõllmõš.
Sääʹmteeʹǧǧ halltõs noorõõđi äʹššliiststes tåʹlǩ õhtt äʹšš, tåimmpââjas 1.9.2024–31.12.2027 šiõttuum Sääʹmteeʹǧǧ riâššõõttâmsåbbar valmštõõllmõš. Halltõs priimi såbbreʹstes riâššõõttâmsåbbar äʹššliist.
Riâššõõttâmsåbbar ääʹvad kuuʹǩǩmõsân Sääʹmteeʹǧǧ vuäzzliʹžžen toiʹmmjam vuäzzlaž Anne Nuorgam Uccjooǥǥâst. Nuõri saakkvuâr âʹnne Sääʹmteeʹǧǧ nuõrisuåvtõõzz vaʹlljeem eeʹttkõõʹsti Rosa-Máren Juuso Jeänõõǥǥâst da Mihku Näkkäläjärvi Aanrest.
Riâššõõttâmsåbbar äʹššliist âʹlnn lie jeeʹrab mieʹldd saaǥǥjååʹđteei da kuõiʹt väärrsaaǥǥjååʹđteei di halltõõzz neellj jeeʹres vuäzzla vaʹlljummuš. Lââʹssen eʹtǩǩõsân lij, što Sääʹmteʹǧǧ šiõttad riâššõõttâmsåbbreʹstes jieʹllemvueʹǩǩ- da vuõiggâdvuõttluʹvddkååʹdd, škooultõs- da mättmateriaal-luʹvddkååʹdd, kulttuurluʹvddkååʹdd, sääʹm ǩiõllsuåvtõõzz, sosiaal- da tiõrvâsvuõttluʹvddkååʹdd di nuõrisuåvtõõzz da nõõmat eeʹttkõʹsttjid täid tåimmorgaanid leʹbe tuâjj-jooukid: Sääʹm parlamentaarlaž suåvtõs, aaʹrhelkåʹddväʹlddõs da ceerkavsååbbar, sääʹm škooultõsaaʹšši õhttsažtuâjjorgaan, sääʹm sosiaal- da tiõrvâsvuõttaaʹšši õhttsažtuâjjorgaan, aanarsääʹmaaʹšši saǥstõõllâmkåʹdd, eettlaž vuäppõõzzi tåimmorgaan, Bareeʹnts euroaarktlaž suåvtõõzz alggmeerai tuâjj-joukk da Sääʹm Ǩiõllkaʹlddi halltõs.
Äʹššliist mieʹldd Sääʹmteeʹǧǧ sååbbar ǩiõttʼtââll riâššõõttâmsåbbreʹstes še vaalpââʹj toiʹmmjemprograamm 2024–2027.
Tåimmpââjas 1.9.2024–31.12.2027 šiõttuum sääʹmteeʹǧǧ riâššõõttâmsåbbar ââʹnet 23.9.2024 čiâss 10 ääʹljeeʹl Sajoozzâst, Aanrest. Sååbbar juätkkai taarb mieʹldd 24.9.2024.
Sääʹmteeʹǧǧ sååbbar eeʹttkâstt Sääʹmteeʹǧǧ pââimõs tuʹmmeemvääʹld. Tõt noorââtt 4-5 vuâra eeʹjjest. Såbbar lie õlmmâz da tõiʹd pâstt seuʹrrjed pääiʹǩ âʹlnn parlameʹnttpääiʹǩest leʹbe Zoom-webinaar pääiʹǩ. Parlameʹnttpääiʹǩest tuʹlǩǩeemneävv lie seuʹrrjeeʹji ââʹnnmest. Vuõigg vuõlttõõzz mieʹldd vuäitt kulddled tuʹlǩǩuum ǩiõl pääiʹǩest kullum ǩiõl lââʹssen. Sääʹmteeʹǧǧ tiuddsåbbar tuʹlǩǩeet lääddas di pukid Lääʹddjânnmest jieʹlli koolm sääʹmǩiõʹlle (nuõrtt-, aanar- da tâʹvvsääʹmm). Sääʹmteeʹǧǧ sååbbaräʹššǩeeʹrj käunnʼje dokumeeʹntin tääiʹben.
Lââʹssteâđ :
Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi
