Sämitigge mieđeet stipendijd kuuđâ ollâškovlâuáppei

Anne-Máret Labba, Mirka Kelahaara, Mari Mäkitalo, Pihla Pulkkinen, Mervi Semenoff já Henna Tervaniemi finnejeh taan ive Sämitige ollâškovlâuáppeid uáivildum stipendijd. Sämitigge almottij roovvâdmáánu 11. peeivi uuccâmnáál ohtsis kuttâ 500 euro stiipeend, moh lijjii uáivildum sämikielâ já/teikkâ sämikulttuur válduamnâs- já uálgiamnâsuáppeid sehe uáppeid, kiäh uásálisteh ollâtääsi škovliittâsân, mii vaalmâšt sämikielâlâš pargoelimân.

Stiipeenducâmušah pottii ohtsis 7. Stiipeend uuccâmäigi nuuvâi 27.10. Škovlim- já oppâmateriallävdikodde meridij stipendij jyehimist 18.11. čuákkimist.

Anne-Máret Labba uáppá sämikielâ já kirjálâšvuođâ säämi ollâškoovlâst (Sámi allaskuvla). Mirka Kelahaara lii sosiaal- já tiervâsvuođâsyergi áámmátolmooš, kote čođâldit Oulu áámmátlii máttáátteijeeollâškoovlâst áámmátmáttáátteijee totkos. Mari Mäkitalo uáppá Oulu ollâopâttuvâst sämikulttuur, sämikielâ, psykologia já tiervâsvuotâtiäđuid. Pihla Pulkkisii uápui válduamnâsin Oulu ollâopâttuvâst lii kulttuurantropologia já arkeologia já uálgiamnâsin sämikulttuur já tavesämikielâ. Mervi Semenoff uáppá Oulu ollâopâttuvâst válduamnâsin nuorttâlâškielâ já uálgiamnâsin sämikulttuur. Henna Tervaniemi uáppá anarâškielâ já sämikulttuur Oulu ollâopâttuvâst.

Sämitigge kijttá puoh stiipeendocceid já tuáivut juáhážân luho já miänástume sehe uápuin et puáttee pargoelimist! 

Kove: Johanna Labba