Sämitigge uásálist haahân, mii valmâštâl tooimâid šoŋŋâdâhnubástusân vuáhádumán

KISS LIFE SIP 2030-haahâ lii hahâolesvuotâ, mii vuáđuduvá staatârääđi aalmuglii šoŋŋâdâhnubástusân vuáháduttemvuáváámân (KISS2030) já mii olášut tooimâid šoŋŋâdâhnubástusân vuáhádumán. Haavâ valmâštâllâm tahhoo vijđes oovtâstpargoost já toos occoo ruttâdem EU LIFE-ohjelmist. Haavâ olášume lii kiddâ tast, mieđettuvvoo-uv toos ruttâdem.

– Taat-uv tälvi čuujoot čielgâsávt tom, ete šoŋŋâdâhnubástus lii tääl tuođâi uási mii elimist já iäláttâsâin. Mij tarbâšep kiävtun puoh máhđulii tiäđu já mättim šoŋŋâdâhnubástusân vuáháduumeest, vâi mij pastep nuuvt pyereest ko máhđulâš vuáháduđ uđđâlágán tiilijd. Lii eromâš tehálâš, ete Sämitigge meridij vyelgiđ haahân mieldi, iätá I värisaavâjođetteijee Leo Aikio.

Haavâ tuáváášjuurdân lii nubásmuvvee, uáinuid já ráhtusijd nubásmittee vuáhádume.  Haavâ kuávdáš vyevih láá keevâtliih vuáhádumečuávduseh já mättim ovdedem. Haavâ tááhust teháliih teemah láá tiervâsvuotâ, luánduriggoduvah, huksejum piirâs, torvolâšvuotâ sehe arktâsâš kuávlu já sämmiliih.

Ton pargopakkeet valmâštâllâm, mii kuáská sämmilij vuáhádumán šoŋŋâdâhnubástusân, joođeet Laapi ollâopâttuv tutkâmprofessor Rauna Kuokkanen. Laapi ollâopâttuv lasseen pargopakettist láá mieldi Luke, Syke, pirâsministeriö já Áimutiettuu lájádâs. Haavâ ruttâdmist 60 % puáđáččii EU LIFE-ruttâdmist já haavâst lii 40 % stuárusâš jiešruttâdemuási.  Sämitige olesbudjetin haavâst lii vuávájum 440 840 eurod, kuás jiešruttâdemuási meeri lii 176 335 eurod. Sämitigge lii finnim nonnim ulguupiäláá jiešruttâdemuásist eennâm- já meccituáluministeriöst já pirâsministeriöst.

Sämmilij šoŋŋâdâhnubástusân vuáhádumevuávám valmâštâllâm kulá Sämitige iäláttâs-, vuoigâdvuotâ- já pirâssektor valjâpaje 2024–2027 njunošulmijd.

Sämitigge já eennâm- já meccituáluminister Essayah teivâdii

Sämitige I värisaavâjođetteijee Leo Aikio teeivâi tolebáá kuovâmáánust eennâm- já meccituáluministeriö já pirâsministeriö Helsigist. Teivâdmijn savâstâllii sämmilij šoŋŋâdâhnubástusân vuáhádume oovdedmist já KISS LIFE SIP 2030-haavâ jiešruttâdemuásist. Lasseen savâstâllii päkkiluosâtiileest Tiänu- já Njiävđámjuuvâst. Teivâdmân uásálistijn I värisaavâjođetteijee lasseen Sämitige iäláttâs -já pirâslahâčällee Sarita Kämäräinen já vs. pirâsčällee Leena Niska.

Sämitige já eennâm- já meccituáluministeriö teivâdem 13.2.2025. Kooveest čižetpeln: vs. pirâsčällee Leena Niska, eennâm- já meccituáluminister Sari Essayah, I värisaavâjođetteijee Leo Aikio, iäláttâs- já pirâslahâčällee Sarita Kämäräinen já kansliahovdâ Pekka Pesonen.

– Lii velttidmettum, ete sämmiliih láá jiejah mieldi valmâštâlmist haavâid, moh sijjân tuođâlávt kyeskih. Mij kijttep eennâm- já meccituáluministeriö mávsulijn savâstâlmijn já eromâšávt tast, ete mist lii ohtsâš uáinu KISS LIFE SIP-haavâ jiešruttâdemuásist, iätá värisaavâjođetteijee Aikio.

Lasetiäđuh:

Leo Aikio
I värisaavâjođetteijee
040 621 6505
leo.aikio@samediggi.fi

Leena Niska
vs. pirâsčällee
044 901 3900
leena.niska@samediggi.fi