Sámediggi oassálastá prošektii, mii válmmaštallá dálkkádatnuppástussii vuogáiduvvama doaibmabijuid
Sámediggi mearridii čoahkkimis 24.2.2025, ahte oassálastá KISS LIFE SIP 2030-prošektii. Eana- ja meahccedoalloministeriija ja birasministeriija sohpe, ahte dat vástidit Sámedikki iežasruhtadanoasis.
KISS LIFE SIP 2030-prošeakta lea prošeaktaoppalašvuohta, mii vuođđuduvvá stáhtaráđi álbmotlaš dálkkádatnuppástusa vuogáiduvvanplánii (KISS2030), ja mii ollašuhttá dálkkádatnuppástussii vuogáiduvvama doaibmabijuid. Prošeavtta válmmaštallan bargojuvvo viiddes ovttasbarggus ja dasa ohccojuvvo ruhtadeapmi EU:a LIFE-prográmmas. Prošeavtta ollašuvvan lea gitta das, mieđihuvvogo dasa ruhtadeapmi.
– Dánge dálvvi luonddudilit čájehit čielgasit dan, ahte dálkkádatnuppástus lea dál duođaige min eallima ja ealáhusaid oassi. Mii dárbbašat iežamet atnui buot vejolaš dieđu ja máhtu dálkkádatnuppástussii vuogáiduvvamis, vai mii bastit buoremus vejolaš vugiin vuogáiduvvat ođđa luonddudiliide. Lea hui dehálaš, ahte Sámediggi mearridii, ahte searvá prošektii, muitala I várreságajođiheaddji Leo Aikio.
Prošeavtta duogášjurddan lea rievdi, perspektiivvaid ja ráhkadusaid nuppástuhtti vuogáiduvvan. Guovddáš mihttomearrin leat geavada vuogáiduvvančovdosat sihke čehppodaga buorideapmi. Prošeavtta dáfus guovddáš temát leat dearvvasvuohta, luondduriggodagat, huksejuvvon biras, dorvvolašvuohta ja maiddái árktalaš guovlu ja sámit.
Bargooasi válmmaštallama, mii guoská sámiid vuogáiduvvama dálkkádatnuppástussii, jođiha Lappi universitehta dutkanprofessor Rauna Kuokkanen. Lappi universitehta lassin bargooasis fárus leat Luke, Syke, birasministeriija ja Dálkediehtaga lágádus. Prošeavtta ruhtadeamis 60 % boađášii EU:a LIFE-ruhtadeamis ja prošeavttas lea 40 % sturrosaš iežasruhtadanoassi. Sámedikki ollesbušeahttan prošeavttas lea plánejuvvon 440 840 euro, goas iežasruhtadanoasi mearri lea 176 335 euro. Sámediggi lea ožžon nannema olggobeale iežasruhtadanoasis eana- ja meahccedoalloministeriijas ja birasministeriijas.
Sámiid dálkkádatnuppástussii vuogáiduvvanplána válmmaštallan gullá Sámedikki ealáhus-, vuoigatvuođa- ja birassektora válgabaji 2024-2027 njunušmihttomeriide.
Sámediggi ja eana- ja meahccedoalloministtar Essayah deaivvadedje
Sámedikki I várreságajođiheaddji Leo Aikio deaivvadii árabut guovvamánus eana- ja meahccedoalloministeriijain ja birasministeriijain Helssegis. Deaivvadeamis ságastallui sámiid dálkkádatnuppástussii vuogáiduvvama ovddideamis ja KISS LIFE SIP 2030-prošeavtta iežasruhtadanoasis. Dan lassin ságastallui ruoššaluossadilis Deanus ja Njávdánjogas.
Sámedikki ja eana- ja meahccedoalloministeriija deaivvadeapmi 13.2.2025. Govas gurutrávddas: vs. birasčálli Leena Niska, eana- ja meahccedoalloministtar Sari Essayah, I várreságajođiheaddji Leo Aikio, ealáhus- ja birasláhkačálli Sarita Kämäräinen ja kansliijahoavda Pekka Pesonen.
Deaivvadeapmái oassálaste I várreságajođiheaddji lassin Sámedikki ealáhus- ja birasláhkačálli Sarita Kämäräinen ja vs. birasčálli Leena Niska.
– Lea vealtameahttun, ahte sámit leat ieža fárus válmmaštallamin prošeavttaid, mat sin mearkkašahtti láhkai gusket. Mii giitit eana- ja meahccedoalloministeriija dehálaš ságastallamiin ja erenomážit das, ahte mis lea oktasaš oaidnu KISS LIFE SIP-prošeavtta iežasruhtadanoasis, dadjá várreságajođiheaddji Aikio.
Lassidieđut:
Leo Aikio
I várreságajođiheaddji
040 621 6505
leo.aikio@samediggi.fi
Leena Niska
vs. birasčálli
044 901 3900
leena.niska@samediggi.fi
